Bergmál

Ég kom heim í dag, endurnærð á sál og líkama, eftir vikulangt orlof að Sólheimum í Grímsnesi á vegum líknar- og vinafélagsins Bergmáls. Dvölin var í einu orði sagt yndisleg! Þarna kynntist ég mörgu góðu og skemmtilegu fólki og var umvafin ást og hlýju frá morgni til kvölds. Góður matur í hvert mál, svo ég stóð á blístri, og ég fór daglega í sundlaugina, þar sem ég var tekin í meðferð (cranio-sacral). Ég fékk fótsnyrtingu við harmónikkuundirleik, og kvöldvaka var á hverju kvöldi, þar sem fram komu listmenn hver öðrum betri. Og síðasta kvöldið var svo dansiball í boði Vinabandsins!

Farið var í Skálholt, þar sem tekið var á móti okkur með tónleikum og fræðslu og indælis máltíð á eftir. Síðan lá leiðin í Dýragarðinn í Slakka, en þaðan var ekið til Hveragerðis, þar sem við þáðum síðdegishressingu í matsal H.N.L.F.Í., með viðkomu í barnafataversluninni Do-Re-Mi á Selfossi, sem ein af félagskonum Bergmáls á og rekur. Voru þar versluð krúttleg barnaföt á vægu verði. Einnig gerðu sumar kvennanna í ferðinni góð kaup í verslun þar við hliðina á, sem ég man ekki hvað heitir, þar sem allt var selt á aðeins þúsund krónur og virtist mér sem þær hefðu himin höndum tekið við þau innkaup !

Allt þetta var okkur þátttakendum algjörlega að kostnaðarlausu, þar sem starfsemi félagsins byggir alfarið á frjálsum framlögum og sjálfboðaliðsstarfi. Hjartans þakkir, öll þið sem gerðuð allt þetta kleift með ykkar óeigingjarna starfi og framlagi .

*Því miður gleymdi ég myndavélinni heima, svo ég get ekki sett inn myndir frá dvölinni hér, en það munu koma myndir síðar á heimasíðu Bergmáls, ef einhver hefur áhuga.

Athugasemdir

[Bertha Sigmundsdóttir, 1.9.2007 kl. 08:17]

Kæra saumakona, Gréta...ég var barasta að fatta að það varst þú sem skrifaðir skilaboð inná bloggið hjá mér í gær, var semsagt að leggja saman tvo og tvo...

Takk aftur fyrir hlýju orðin þín, og ég vildi bara óska þér góðrar ferðar aftur, og þó svo að ég kvitti ekki daglega hér inná, þá fylgist ég alltaf með þér

[Ásthildur Cesil Þórðardóttir, 1.9.2007 kl. 11:41]

Flott og gott mál Gréta mín.  Það er alltaf gott að hitta gott fólk og slaka á.  Velkomin heim aftur.