Heyrst hefur...

Tveir trúðar. Kannski fær Ketill aukahlutverk?

...að Davíð hyggist taka að sér öll hlutverk í Spaugstofunni, nú þegar niðurskurður blasir við hjá RÚV. Þátturinn breytist í eins-manns uppistand.

Þetta væri alveg upplagt. Maður með reynslu, sem hvorki þarf að hafa fyrir því að semja handrit eða brandara. Það væri nóg að fyrir hann að spinna frá eigin brjósti. Svo gæti hann endurunnið gamalt efni úr útvarp Matthildi til uppfyllingar.

Verst að það yrði að leggja alla aðra starfsemi RÚV niður, þegar allir peningarnir færu í að borga launin hans Davíðs, áhorfið myndi hrapa og hópur þeirra sem neitar að borga afnotagjöld stækka. Kannski er þetta, við nánari umhugsun, ekki góð hugmynd.

 Hvaða listanafn ætli framboðið hans Davíð fái, - kannski O?

Það hefur verið notað áður:

O flokkurinn svokallaði var grínframboð sem bauð fram í Alþingiskosningunum 1971 undir nafninu Framboðsflokkurinn. En það er vissulega satt að það var orðið verulegt áhyggjuefni hjá frambjóðendum flokksins að fylgið virtist ætla að verða of mikið. En þegar talið var upp úr kjörkössunum reyndist fylgið hafa verið um 2% og enginn komst á þing í það skiptið.

Davíð: „Þá mun ég snúa aftur"

Núna...

 

 

 

 

 

 

 

 

 

 

 

...ætla ég að biðja bloggvini mína að senda mér góða strauma.

Ég fékk að vita í gær að nýja lyfið sem ég fékk fyrir rúmum mánuði síðan virkar ekkert á krabbameinsvöxtinn sem tekist hefur að halda niðri með daglegri lyfjatöku s.l. 8 ár, en sem er kominn af stað aftur. Þetta hef ég reyndar fundið greinilega síðustu 2 vikur, að mér væri ekki að batna, heldur varð ég einungis óhemju slöpp, utan við mig og framtakslaus af því að taka það og leið helmingi verr en áður.

Þetta þýðir að ég þarf að fara í lyfjameðferð, sem hefst á fimmtudaginn í næstu viku og mun taka fjóra mánuði,  frá 11. desember og þangað til í byrjun apríl.Ég er í rauninni fegin að vera búin að fá að vita þetta, þá er það orðið raunverulegt verkefni að takast á við og ég fæ góða hjálp frá lækni og hjúkrunarfólki við að komast í gegnum þetta.

Ég fæ lyf í tvær vikur, og svo frí í eina. Ég mun ekki missa hárið. Ég fæ frí um jólin og svo ætla ég til Kanarí í janúar, þá þarf ég frí í eina viku til viðbótar. Ég verð vonandi bara hress á meðan á þessu stendur, það er víst misjafnt hvernig lyfin fara í fólk. Ef mér líður ekki verr en á síðasta lyfi þá er þetta í lagi.

Ég mun þurfa á öllum mínum kröftum og kjarki að halda þennan tíma. Það er von framundan, kannski stendur meinið í stað, kannski minnkar það og ef allt fer á besta veg mun það hverfa alveg.

Ég fór í Heilsuhúsið áðan og keypti mér vítamín og fleira til að undirbúa mig undir það sem fyrir dyrum stendur. Svo er að halda í bjartsýni og góðar hugsanir, á því byggist batinn, jafnframt lyfjagjöfinni.

Þetta á ekki að verða veikindablogg héðan í frá, en ég taldi rétt að láta bloggvini mína sem lesa bloggið mitt reglulega vita af þessu.

Bíbí Ólafsdóttir

 

 

 

 

 

 

 

 

 

 

 Ég var að horfa á sunnudagsviðtal Evu Maríu við Bíbí Ólafsdóttur, miðil.

Þetta var ólíkt betra viðtal en viðtalið sem ég gagnrýndi svo harðlega s.l. mánudag.

Þetta viðtal var opið og einlægt (hvernig er annað hægt með viðmælanda eins og Bíbí?) og gaf mér mjög mikið.

Bíbí ræddi mikið um hreinskilni, um sannleikann og mikilvægi hans í samskiptum manna, að hafa allt uppi á borðinu og grafa ekki leyndarmál í djúpum vitundarinnar. Slíkt leiðir aðeins til sjúkleika.

Út frá þeim orðum hennar langar mig til að bæta við frá eigin brjósti að það sama hlýtur að eiga við hvort sem um einstaklinga eða þjóðfélög er að ræða, það gefur auga leið að séu þeir sem eiga að stjórna þjóðfélaginu ekki hreinskilnir við þjóð sína þá er voðinn vís.

Lokaorðin hennar Bíbí voru þörf áminning til allra um mikilvægi kærleikans, mikilvægi þess að elska meðbræður sína.

Eva María, þú færð prik frá mér fyrir þetta viðtal.

Bestu þakkir.

(Eva, vartstu kannski búin að lesa bókina hennar Vigdísar fyrir viðtalið? )

Ég ætla að setja hér inn vísu sem ég rakst á í gömlu dóti, ég er ekki viss um hver höfundurinn er, svo ég ætla ekki að eigna hana neinum:

Ástin er svo djúp, svo djúp.

Dýpra ekkert getur

eða nokkurn helgi-hjúp

henni æðri metur.

YouTube: Viðtal við Vigdísi Grímsdóttur um bók hennar um Bíbí.

Hm...

...en hvernig var það með skuldleysi ríkissjóðs á fyrri hluta ársins?...ætli Geir hafi heldur ekki borið neina ábyrgð á því á þeim tíma, meðan margir héldu, hann líkast til þar með talinn, að allt væri bara í gúddí, stóra blaðran sveif um og allir skemmtu sér rosa vel - ?

Annað heyrðist manni á honum þá, eða alla vega mátti álíta að það bæri að þakka þeirri ríkisstjórn sem hann fer fyrir þann árangur - þar með hlýtur sú stjórn líka að hafa borið ábyrgð á þeim góða árangri. Sem nú er reyndar fyrir bí, eins og hver önnur sprungin blaðra. Hvar er ábyrgðin þá núna, hverjum ber að þakka trakteringarnar seinustu vikur, blöðruna sem sprakk í partýinu miðju?

Geir: Tel mig ekki persónulega ábyrgan

Lincoln um byltingu

"This country, with its institutions, belongs to the people who inhabit it. Whenever they shall grow weary of the existing government, they can exercise their Constitutional right of amending it or their revolutionary right to dismember it or overthrow it."

~ Abraham Lincoln, 1st Inaugral Address March 4, 1861

 Meira gott hér: Wikiqote: Abraham Lincoln

Skilaboð frá 1995

Handavinna

Þessar síður bjó ég einhvern tíma til, - skannaði inn gamlar síður úr dönskum blöðum og víðar að.

Kannski getur einhver fundið eitthvað sem hann/hún getur nýtt sér á þeim.

Klikkið á myndirnar til að stækka þær. Svo er upplagt að prenta þær út, ef það freistar að prófa og nota eittvhað af þessu efni.

Saumakistan

Jólin

Ég hef verið að velta fyrir mér...

...spurningu sem maður einn bar upp í kommenti á bloggi Birgittu Jónsdóttur um daginn, í umræðu sem spannst út frá óeirðunum við lögreglustöðina á Hlemmi s.l. laugardag. Þessi spurning sló mig og mér finnst hún stórmerkilegt íhugunarefni:

"Hvernig er hægt að brjótast inn á stað sem á að vera opinn og [er] ætlaður almenningi?"

 Áhugaverður punktur.

Hefur lögreglan í raun og veru leyfi til að læsa að sér eins og hún gerði þennan laugardag? Á ekki varðstöðin að vera opin almenningi allan sólarhringinn, vilji hann leita eftir aðstoð, eða leita svara við spurningum (um atriði sem varða löggæsluna að sjálfsögðu)?

Ég reyndi að leita á netinu að svörum við þessu, lagagreinum eða öðru, en varð einskis vísari.

Hefur einhver svör við þessum spurningum?

Einhverra hluta vegna...

...datt mér þessi dýrategund (sú neðri á myndinni) í hug:

...þegar ég sá þessa mynd:

 

 

 

 

 

 

 

Myndina sá ég í bloggi Sigurjóns Þórðarsonar.

Hún mun vera tekin í sextugsafmæli Davíðs Oddssonar.

"Étt´ann sjálfur!"

Mikið vildi ég að það væri væri hægt að smella þessum tveimur mönnum saman í einn.

Ómar hefði farið létt með að skella í einn brandara og fá þingheim til að veltast um af hlátri yfir ummælum Björns Bjarnasonar, í staðinn fyrir að hrópa í bræði: "Étt´ann sjálfur!"

Báðir eru með afbrigðum þrjóskir, eða á ég að segja þrautseigir. Ímyndið ykkur útkomuna ef sú þrautseigja væri öll samankomin í einum manni. Þá yrðu fjöll að víkja úr stað!

Svo væri extra bónus að það væri engin hætta á að þeir færu í hár saman - og hárunum myndi fjölga.

rúv: Steingrímur J. reiðist Birni Bjarnasyni

Magga stigakona

Hvenær skyldi Magga stigakona verða kærð og handtekin?

Kannski næsta föstudag?

Þessi spurning er búin að brenna á vörum mér.

(Ég reikna með að það sé skárri bruni en bruni af piparúða; ég hef sem betur fer aldrei orðið fyrir því að fá hann á mig og hef þess vegna  ekki samanburð).

Ég stal þessari mynd af bloggi Salvarar, þar sem ég hef hvergi annars staðar fundið svona góða mynd af stigakonunni.

Salvör er góður ljósmyndari. Vonandi kærir hún mig ekki fyrir lögreglu eða Persónuvernd eða hvert sem á nú að kæra fyrir brot á höfundarrétti.

 P.s. Asni var ég.  Auðvitað átti ég að skoða síðuna hans Helga J. Haukssonar, þess fantagóða ljósmyndara , - sem þar að auki hefur gefið leyfi til að myndir hans séu notaðar á blogginu, svo framarlega sem það sé ekki gert í ærumeiðandi tilgangi, - til að finna góða mynd af stigakonunni. Leyfi samt mynd Salvarar að vera hér áfram, þó ég bæti mynd Helga hér við. Hætti áfram á lögsókn. Fólk getur þá dundað sér við að bera þær saman.

Haukur útskýrir ágætlega í nýjustu færslu á síðu sinni hvers vegna meðlimir aðgerðarhópa anarkista hylja andlit sín á meðan á gjörningum stendur. Það rann upp fyrir mér ljós að samkvæmt  skýringu Helga er hún sú sama og á skýringin á því af hverju þjóðkirkjuprestar skrýðast hempum við kirkjulegar athafnir, sem sé til að draga athygli þess sem sér og heyrir frá persónunum sem framkvæma athafnirnar og á sama tíma að athöfninni sjálfri. Nokkuð augljóst þegar maður veit það. Og mætti ætlað það hógvært gagnvart málstað þeim málstað sem barist er fyrir á friðsamlegan háatt.

Þetta er svo sem ágætis skýring út af fyrir sig. Samt sem áður líkar mér ekki þessi leynd. Hún minnir mig um of á Ku Kux Klan eða aðra terrorista til þess að ég sætti mig fullkomlega við hana. Örugglega er mörgum öðrum en mér líkt farið.

Því hvar eru mörk þess friðsamlega og hins glæpsamlega? Hvern er hægt að draga til ábyrgðar ef hlutir fara úrskeiðis, ef engir vita hverjir voru þar á ferð? Er það ekki einmitt leyndin sem barist er á móti? Og er ekki hamrað á því þessa dagana það verði að leiða í ljós hjá hverjum ábyrgðin á öllu leynimakkinu liggi í þjóðfélaginu? Þeir eru ansi margir huldumennirnir, sem þó ganga ekki með hauspoka, heldur reiða þeir sig á þögn góðvina sinna sem launa þeim vinargreiðana svo lítið ber á.

Allt þetta leyndar-dæmi þykir mér vafasamt þó sagt sé að það þjóni tilganginum, það þjóni þjóðinni og stuðli að bættu þjóðfélagi. En það hefur bara of lítið heyrst frá þessum mönnum hvernig þeir ætla að framkvæma hlutina og hvað aðrar aðferðir þeir hafa hugsað sér. Hvernig þjóðfélag vilja anarkistar sjá, fyrir utan það sem segir í þessum slagorðum:Niður með kapitalismann - Réttlætið lifi!

Kíkið svo á frábæra tillögu Jennýar Önnu - og viðbót mína við hana - hér í athugasemdakerfinu.

 

Ferðalok

Tilvitnun dagsins

Quote of the Day
Things do not happen.Things are made to happen.
John F. Kennedy

Ég sá ekki betur...

...en að það kæmi hik á Geir H. Haarde rétt  í þeim töluðum  orðum  í ræðustóli á Alþingi í dag að ekki beri að kjósa utan hefðbundins kjörtímabils "nema eitthvað sérstakt komi upp á".

Hefur ekki "eitthvað sérstakt" komið upp á í íslensku þjóðfélagi?

Var bankahrunið ekki "eitthvað sérstakt"?

Var það bara vondur draumur?

Er allt sem á eftir fylgdi einungis martröð heillar þjóðar?

Hvers vegna voru sett neyðarlög  fyrir tæplega tveimur mánuðum síðan? 

Hafði ekki "eitthvað sérstakt" komið upp á, "eitthvað sérstakt" sem gaf forsætisráðherra ástæðu til að enda ávarp sitt til þjóðarinnar, í beinni útsendingu fjölmiðla, með orðunum "Guð blessi Ísland" ?

Ef þetta var bara vondur draumur þá stendur hann enn.

Vonandi vakna einhverjir bráðum og gera "eitthvað sérstakt".

Myndin með færslunni er héðan:  www.gutenberg.org/files/11571/11571-h/11571-h.htm

Sirrý Geirs

Ég var ekki ánægð með viðtalið sem Eva María tók við Sirrý Geirs, fegurðardrottningu Íslands árið 1959.  Eva var alltof aðgangshörð, hraðmælt og hvassyrt í þessu viðtali, hraunaði nánast yfir fegurðardrottninguna fyrrverandi (sem enn er glæsileg kona), sýndi henni virðingarleysi, ágang og ónærgætni, talaði niður til hennar og lá við að hún gerði grín að henni á köflum, fannst mér. Kynslóðabilið blasti við.

Sirrý er af þeirri kynslóð kvenna sem voru og eru, hvað sem aldri líður, Dömur með stóru d-i, Eva María er hress og kúl - þetta tvennt féll ekki saman svo að úr því yrði bitastætt viðtal. Eva María skautaði á léttum nótum og með hraða eldingar yfir óvenjulega og viðburðaríka ævi og feril viðmælandans, setti hann oftar en einu sinni í varnarstöðu með beinskeyttum spurningum sínum og athugasemdum og náði þess vegna engri stemningu eða trúnaði. Viðtalið minnti á stundum meira á einvígi með orðum, líkt og rætt væri við umdeildan stjórnmálamann, en það sem kynnt hefur verið í dagskrá sem notalegar samræður og svipmyndir af áhugaverðu fólki á sunnudagskvöldum. - Kannski hefur Eva María smitast af þeim æsingi og óróa sem nú ríkir í þjóðfélaginu og haldið að það væri hlutverk sitt að þjarma að viðmælandanum um hreinskilin svör við þeim léttvægu spurningum sem hún lagði fyrir hann? Æsingur hennar og ákafi gæti bent til þess.

Ég held að með annarri og afslappaðri aðferð hefði þetta getað orðið mjög fróðlegt viðtal um það hvernig heimurinn leit út þegar Sirrý lifði sína blómadaga í Bandaríkjunum og Austurlöndum fjær, séður með augum fegurðardrottningarinnar. Ég hefði viljað fá að heyra meiri lýsingar á því hvernig lífi hún lifði, hverja hún umgekkst og svo framvegis. Eva gaf viðmælandanum ekki færi á að svara nema mjög yfirborðslegum spurningum, sem hún virtist haf unnið upp úr gömlum kjaftasögum, rétt tæpti á málum og gaf viðmælandanum lítið ráðrúm til að svara, með óðagoti og framítökum. Sérstakega þar sem það kom fram í viðtalinu að Sirrý þjáist af astma og á þess vegna ef til vill ekki gott með að grípa orðin á lofti og henda þeim til baka í snarhasti. Mér fannst það gott hjá Sirrý þegar hún sagði við Evu, framarlega í viðtalinu: "Já, maður rölti auðvitað ekki um Vatnsmýrina, - það var svið...". Eins var það flott hjá henni þegar hún, fyrrum enskukennari, rak Evu Maríu á gat með orði sem hin síðarnefnda skildi ekki, það er að segja enska orðinu "nepotism", sem svar við nærgöngulu gaspri hennar um meint lauslæti leikkvenna, Sirrý það með taldri, virtist vera, í Hollywood.

Eva María virðist ekki hafa gefið Sirrý færi á að koma með gamlar myndir sem hún á í sínum fórum frá ferli sínum sem fegurðardrottning og sjónvarps- og kvikmyndaleikkona, sem hún sagðist eiga miklu betri í sínum fórum en þær sem sýndar voru í þættinum, máðar og óskýrar margar hverjar. Það var samt gaman að sjá brot úr þeim myndum sem hún hefur leikið í, þó Sirrý væri reyndar ekki fullkomlega sátt við valið á broti úr þeirri mynd þar sem hún sagðist hafa fengið tækifæri til að sýna raunverulegan leik. Hún fékk aldrei nein stór hlutverk, en það var (og er enn) samt óvenjulegt að íslensk kona hafi starfað í kvikmyndum vestanhafs, þó dæmin séu fleiri síðar (Anna Björns, María Ellingsen, Anita Briem, allar ljóskur eins og Sirrý!).

Eini ljósi punkturinn fannst mér þegar Eva María hvatti Sirrý til að svara þeim ljóta rógi sem dreift var um hana hér á landi og skemmdi fyrir henni eftir að hún flutti heim og fór að starfa við kennslu, auk þess sem hann hefur augljóslega sært hana djúpt. Mér fannst ógleymanlegt að heyra þessa fallegu, sjötugu konu segja í sjónvarpi allra landsmanna, þegar Eva María lagði fast að henni að svara fyrir sig og verja sig eftir öll þessi ár: "Ég stundaði aldrei vændi, - ég veit ekki hvað það er."

Í þessari Morgunblaðsgrein sem ég fann á netinu, þar sem aðeins er fjallað um Sirrý að hluta til, meðal annarra leikara, koma fram mun meiri upplýsingar um viðburðaríka ævi hennar en í öllum viðtalsþætti gærkvöldisins. Þar sést skýrt að af nógu efni var að taka fyrir þáttastjórnandann til að gera viðtalið áhugaverðara en raunin varð. Þetta var illa unnið viðtal af hálfu stjórnandans, og bar þess öll merki að hafa verið unnið í flaustri. Mér finnst, sem aðdáanda Sirrýar í barnæsku og einnig sem áhorfandi ríkisfjölmiðilsins, að fegurðardrottningin fyrrverandi hefði átt betra skilið en þessi vinnubrögð, fyrst hún á annað borð gaf kost á því að koma í viðtal.

Eva María, svona á ekki að taka viðtöl!

Á þessari síðu má lesa lauslega samantekt á ferli Sirrýar og eiginmanns hennar, þaðan er myndin, þar sem Sirrý auglýsir Kent-sígarettur í BNA árið 1961-62, einnig tekin: : old.sksiglo.is/page.php?25

Barack Obama er ekki afkomandi bandarískra þræla

Mér datt í hug að skrifa þessa færslu þegar ég hlustaði á ræðu Hjartar Magna Jóhannssonar, fríkirkjuprests, í útvarpsmessu í morgun, þar sem hann talaði um Barack Obama, forsetaefni Bandaríkjamanna, sem afkomanda þræla, og átti þá auðheyrilega við þræla sem seldir voru mansali til Bandaríkjanna fyrr á tímum.

Þetta er misskilningur sem mig langar til að leiðrétta.

Barack Obama yngri (junior) er ekki afkomandi bandarískra þræla. Faðir hans, Barack Obama eldri (senior) var Kenýamaður, af kynflokknum Luo, sem að vísu fæddist áður en landið hlaut sjálfstæði, en hlýtur þó að teljast að hafa verið borinn frjáls. Má vera að frændur hans hafi fyrr á öldum verið leiddir í þrældóm vestur um haf. Kann að vera að einhverjir forfeðra hans hafi einhverntíma verið þrælar höfðingja á þeim slóðum sem nú kallast Kenýa, eða jafnvel víðar í Afríku. Með sömu rökum mætti kalla alla Íslendinga afkomendur þræla.

Það má vel vera að Barack Obama samsami sig afkomendum bandarískra þræla í baráttu þeirra fyrir mannréttindum og að þeir séu stór hluti áhangenda hans, - en hann er ekki einn þeirra.

Það virðist einnig oft gleymast í umtalinu um Obama að hann er ekki alfarið svartur - hann er af blönduðum kynþáttum, þar sem móðir hans er hvít - þó svo vissulega eigi skilgreiningin afrísk-amerískur fullkomlega við hann, sakir uppruna hans.

Rétt skal vera rétt og til haga haldið.

 

Maístjarnan

Ó hve létt er þitt skóhljóð
ó hve leingi ég beið þín,
það er vorhret á glugga,
napur vindur sem hvín,
en ég veit eina stjörnu,
eina stjörnu sem skín,
og nú loks ertu komin,
þú ert komin til mín.

Það eru erfiðir tímar,
það er atvinnuþref,
ég hef ekkert að bjóða,
ekki ögn sem ég gef,
nema von mína og líf mitt
hvort ég vaki eða sef,
þetta eitt sem þú gafst mér
það er alt sem ég hef.

En í kvöld lýkur vetri
sérhvers vinnandi manns,
og á morgun skín maísól,
það er maísólin hans,
það er maísólin okkar,
okkar einíngarbands,
fyrir þér ber ég fána
þessa framtíðarlands.

Jón Ásgeirsson/Halldór K. Laxness

Kosningar í maí !

Ég er dálítið smeyk...

...um að Björn, sá gamli refur,  hafi rétt fyrir sér í þessu.

Það var rakið í kvöldfréttum Rúv-sjónvarp að engin þeirra tillaga um vantraust sem hefur verið lögð fyrir þingið í starfstíð þess hefur gengið í gegn. 

En kannski verður nú brotið blað í sögu þjóðarinnar?

Í þessu sem mörgu öðru.

Það má alltaf halda í vonina.

Telur vantrauststillögu efla samstarf ríkisstjórnarinnar