Sund

þó dýfingar af hæsta brettinu séu tilkomumiklar og glæsilegar og veki hrifningu áhorfenda, þá er nauðsynlegra að kunna að troða marvaðann án þess að örmagnast, til að halda höfði, sínu og stundum annarra, upp úr vatni. gott er að kunna bringusund til að komast áfram og einnig skriðsund þegar meira liggur við og mjög hentugt er að geta látið sig fljóta ef svo ber undir. flugsund er vitaskuld sjónrænt mjög áhrifaríkt fyrir þá sem vilja að eftir þeim sé tekið. en stundum getur verið nauðsynlegt að synda í kafi, til dæmis þegar öll önnur sund virðast lokuð, þó má ekki synda kafsund svo lengi að maður verði súrefnislaus og það líði yfir mann og maður drukkni, því þá verður það hvort tveggja, vita gagnslaust og tilgangslaust.

Athugasemdir

[Jón Sigurgeirsson , 1.3.2007 kl. 11:28]

Ég skil duldu merkingu þessa og tengi þetta flestu sem á sér stað í íslenskri pólitík og mannlífi nú um stundir.

[Sigfús Sigurþórsson., 1.3.2007 kl. 11:36]

Heyrðu Gréta Björg, þegar maður les þetta sér maður strax að þetta höfðar nú bara til als lífsins.

Kv. SigfúsSig.

[María Anna P Kristjánsdóttir, 1.3.2007 kl. 13:32]

Mikið rétt hjá þér Gréta Björg, rétta er að kunna öll sundtök til að komast áfram í lífinu , en hver og einn verður að velja sér það sundtak sem honum eða henni hentar best.

Kveðja

María

[Greta Björg Úlfsdóttir, 1.3.2007 kl. 17:51]

Kæru vinir!

Ég gleymdi auðvitað að geta þess hversu gott það getur verið að kunna baksund, því þá getur maður á sundinu virt fyrir sér veðrabrigðum og velt því fyrir sér hvað sé skýjum ofar. En geri maður of mikið af því getur maður þó átt á hættu að vera talinn skýjaglópur, einnig getur maður hæglega villst af leið eða lent í árekstrum, til að mynda ef margir synda baksund í sömu laug.