Refskák sem fór úr böndunum...

Það læðast að manni (auknar) grunsemdir við þessa frétt...

Var um að ræða refskák til þess að ná til sín tveimur bankanna og gera þá að ríkisbönkum og losa sig í leiðinni við hina svokölluðu auðmenn og útrásarvíkinga? Leyfa svo Kaupþingi að tóra, í það minnsta fyrst um sinn, þó ekki væri nema fyrir útlitið (lúkkið). Síðan hefði mátt selja "réttum" (það er að segja þægum) aðilum bankana aftur, sem allt útlit er fyrir að muni takast ef svo fer fram sem horfir, þrátt fyrir allt sem fór úrskeiðis.Sem sagt einkabankar áfram, en í höndum "réttra" aðila, eftir hreingerningu.

Refskák, sem síðan fór illilega úr böndunum og hafði ófyrirséðar afleiðingar þegar seðlabankastjóri talaði alvarlega af sér í Kastljósinu, vegna óvæntra og harkalegra viðbragða Gordons "helvísks" Brown forsætisráðherra Breta við þeim yfirlýsingum, og einnig vegna hins almenna ástands á alheimsmörkuðum, geri ég ráð fyrir.

Ef þetta hefði tekist hefði seðlabankastjóri aftur verið kominn í lykilaðstöðu til að deila og drottna. Sem hann er reyndar kominn í nú eftir hrunið, en fórnarkostnaðurinn er sá að þjóðfélagið er í uppnámi, atvinnulífið í stórhættu, Íslendingar hafa misst mannorð sitt erlendis og eru bónbjargarmenn. Fyrir utan alla þá sem misst hafa sparifé sitt (eða hluta af því, eftir því sem nú er sagt).

Þess vegna var Davíð svona óskiljanlega glaðbeittur og sigurviss í Kastljósinu, hann hélt að þetta myndi allt reddast.

Það á aldrei að líðast að pólitíkusar verði seðlabankastjórar. Hvað þá að einstaklingur geti stigið upp úr forsætisráðherrastóli og plantað sér í sæti seðlabankastjóra. 

Björgvin G. Sigurðsson leggur til að bankarnir verði áfram í ríkiseign að einum þriðja, en það telur Þorgerður Katrín af og frá. Enda er einkavæðing stefna Sjálfstæðisflokksins, þó þessum ráðum hafi verið beitt við hreingerningu bláu handarinnar.Það er sama hver kústurinn er, svo fremi sem hann dugir til að sópa því út sem ekki lætur að stjórn.

Hins vegar væri vitanlega ótækt að bankarnir yrðu áfram í ríkiseign skyldi stjórnin falla við næstu kosningar, sem eiga alls ekki að fara fram aftur fyrr en eftir 3 ár að hennar áliti, það er að þegar búið er að ganga frá öllum hnútum í þessu efni.

Það er auðvitað besta mál fyrir Sjálfstæðisflokkinn að hafa bæði  bláu höndina í seðlabankanum og svo einkavæðinguna (les=einkavinahagsmunapotið, önnur einkavæðing er varla til á Íslandi), eftir að búið er að henda út úr henni óþekktargemlingunum. Þetta er yndislegur (að þeirra mati) dúett, sem eflir  kosningasjóðinn og flokksmaskínuna í heilldrjúgu perpetuum mobile (eilífðarvél) fyrir flokkinn.

En ef svo ólíklega vildi til að Sjálfstæðisflokkurinn þyrfti að fara frá völdum væri búið að tryggja að bankastjórar einkabankanna væru stjórnarandstöðunni hliðhollir. Sem vitanlega er þó meiri "hætta" á nú en áður (það er að segja að hann falli) þegar svona fór, en samt sorglega litlar, nema eitthvað mikið gerist í þjóðarsálinni.

Má maður vonast til að síðustu atburðir verði til þess?

Það er von að aldavinir hafi reiðst yfir að hafa verið sópað út, en róast aftur þegar búið var að lofa þeim einhverju snarli í sárabætur.

Tilboði lífeyrissjóða hafnað

Athugasemdir

[Greta Björg Úlfsdóttir, 17.10.2008 kl. 13:40]

Það er lóðið - en þeir höfðu ekki gert ráð fyrir að fórnarkostnaðurinn yrði þessi.

Allt Brown helvískum að kenna að fara að blanda sér í málin og eyðileggja áætlunin.

Þó ekki nema að hluta til, því það virðist ætla að takast að halda öllum inni áfram sem á þarf að halda.

Einvherjir þeir sem þurftu að láta sig hverfa tímabundið fá svo eitthvert snarl síðar.

[DoctorE (IP-tala skráð) 17.10.2008 kl. 13:47]

Fagfólk eingöngu takk.... hvað myndi fólk segja ef Dabbi hefði gerst heilaskurðlæknir... álíka gáfulegt

[Greta Björg Úlfsdóttir, 17.10.2008 kl. 13:51]

Þú segir nokkuð...eins gott að þurfa ekki að leggjast undir þann hníf líka.

[Ásthildur Cesil Þórðardóttir, 17.10.2008 kl. 14:41]

Flott grein hjá þér og pæling.  Það skyldi þó aldrei vera ?

[Greta Björg Úlfsdóttir, 17.10.2008 kl. 14:44]

Heldurðu að ég þurfi nokkuð að leigja mér lífvörð, þó ég hafi látið þessar hugrenningar flakka?

[Greta Björg Úlfsdóttir, 17.10.2008 kl. 14:45]

Því ekki myndi BB útvega mér hann.

[Heidi Strand, 17.10.2008 kl. 14:58]

Góð grein Greta. Þetta er algjört plott.

Manstu 25. des. 1989? Þá varð yngri  sonur mín 6 ára.

[Greta Björg Úlfsdóttir, 17.10.2008 kl. 15:04]

Ég man það reyndar ekki, ætli ég hafi ekki verið of gjörsamlega á kafi í vinnu til að hafa í okkur og á til þess að taka almennilega eftir því eða leggja dagsetninguna á minnið.

Ég er reyndar ekki góð að muna dagsetningar, þó ég fegin vildi. Verð stundum eins og asni út af því. Hvenær gerðist þetta eða hitt, gengur skár með ártölin.

Fræddu mig.

En ég man eftir 26. desember, því þá varð eldri sonur minn 17 ára.

[heidistrand (IP-tala skráð) 17.10.2008 kl. 21:53]