Heimurinn er að breytast

Ég álít, í ljósi síðustu atburða í samskiptum okkar við önnur lönd, að við Íslendingar gerum best í því að hlúa að okkur sjálfum og búa okkur undir að geta verið sjálfum okkur nógir á sem flestum sviðum. Að treysta um of á umheiminn er varlegt, eins og við finnum vel fyrir þessa dagana. Við verðum að treysta á okkur sjálf, fyrst og fremst, það sýnir reynslan okkur.

Annars endum við sem fátækt þróunarland sem önnur betur stæð ríki geta haft í hendi sér, það er að segja meðan þau standa enn af sér efnahagsstorminn sem gerir það að verkum að nú virðist sem þau lönd sem áður töldust hin auðugu og voldugu í heiminum stefni hraðbyri í þrot.

Ég tel það einnig hafa sýnt sig síðustu daga að þau lönd sem við eigum fyrst og fremst að leggja áherslu á að halda góðum tengslum við eru hin Norðurlöndin, þau lönd sem við tengjumst sérstökum menningarlegum og sögulegum böndum.

Það harðnar á dalnum um alla veröld. Við eigum að stefna að því að eiga alltaf hér í landinu nægar forðabirgðir af þeim vörum sem við þufum nauðsynlega á að halda og getum ekki verið án, komi til alvarlegrar heimskreppu, ekki síst vegna landfræðilegrar stöðu okkar. En til þess þurfum við gjaldeyri, þannig að augljóslega verður gjaldeyrisöflun að vera annað megin markmið okkar á komandi árum, í stað þess útstreymis á því sem verið hefur árin á undan. Það er komið í ljós að við höfum eytt margfalt um efni fram á undanförnum árum.

Jafnframt þarf að hlúa að innlendri framleiðslu á vörum fyrir heimamarkað og stefna að því að við getum orðið sem mest sjálfbær um nauðsynjar komi til þess að markaðir lokist og verslun við útlönd verði illmöguleg. Vitanlega verðum við einnig að halda áfram að leita færa til aukins útflutnings á afurðum okkar og gjaldeyrisöflun.

Ennfremur ættum við að nýta þá þekkingu og hugvit sem við búum yfir til að þróa aðferðir við að framleiða efni, til dæmis til nota við framleiðslu á öðrum vörum, úr innlendum hráefnum sem geta komið í stað þeirra sem við í dag teljum okkur tilneydd að flytja inn. Dettur mér í því sambandi í hug frétt á Stöð 2 nýlega þar sem sagt var frá því að beðið væri eftir gjaldeyrisheimild til að greiða pöntun á efnablöndu sem nauðsynleg er í framleiðslu á mjólkurvöru og fleiru. Er ekki hugsanlegt að við gætum í framtíðinni framleitt slíkar vörur sjálf?

Leggja þarf áherslu á að auka við þekkingu á náttúru okkar og þeim vannýttu auðlindum sem hún býr yfir, svo og tækniþekkingu til að vera þess megnug að nýta þá kosti sem skyldi. Og þar á ég ekki eingöngu við raforku. Til þess þurfum við vel menntað fólk, þannig að leggja verður mikla rækt við menntun ungs fólks, og raunar tel ég að við eigum að setja hana í forgang þegar kemur að fjárveitingum. Tími uppbyggðra þjóðvega í hvern krók og kima landsins fyrir risajeppa að þeytast eftir er liðinn. Minnkum hraðann, aukum gæðin!

Við ættum að reyna að læra af reynslu elstu kynslóðarinnar í þessu landi, fólkinu sem ólst upp við aðhald og sparsemi, ekki vegna þess að slíkt væri álitin sérstök dyggð, heldur af illri nauðsyn því annað var ekki í boði.

Kortinu rændi ég héðan.

Athugasemdir

[Dunni, 18.10.2008 kl. 09:25]

Er svo sammála þér.  Það virðist sem margir "vinanna" hafi snúið við okkur bakinu nú. Það eru eiginlega bara Norðmenn sem hafa sýnt okkur vinarþel síðustu vikurnar.

Það er því ljóst að við verðum að treysta á okkur sjálf og hvert örðu. Með iðni, ráðdeild og nægjusem klárum við okkur.

[Greta Björg Úlfsdóttir, 18.10.2008 kl. 14:49]

Því miður eru samt horfur á því nú að við lendum í greipum Alþjóðagjaldeyrissjóðsins - úr því fáum við litlu ráðið um eigin hag.

Líklega sýnir staðan í dag okkur að við erum hreinlega ekki fær um að gæta hans...of seint, of seint...

Þetta er svo sem ekki nýtt í Íslandssögunni. Man nokkur eftir Gamla Sáttmála?

[Anna Benkovic Mikaelsdóttir, 18.10.2008 kl. 23:17]

Norðmenn (við sjálf fyrir 1100 árum) hafa sett skilyrði fyrir GEGNSÆJI sem alþjóðabannkinn veitir...svo vilja þeir bjarga okkur!!! "Valdamenn íslands vilja það ekki, þá sérst tengslin á milli valds og fjöldk-skylduteingsla og vinnáttuteingsla...????

[Greta Björg Úlfsdóttir, 19.10.2008 kl. 00:05]

Já, Anna, kannski er það eina rétta að IMF fái hér yfirráð í fjármálum - Ísland er hvort sem er fyrir löngu sokkið.

[Anna Benkovic Mikaelsdóttir, 19.10.2008 kl. 01:49]

bARA TÍMABUNDIÐ...gRÉTA MÍN, VIÐ ERUM Í STÖÐU tÍTANIKS (eins og spaugstofan benti á) og nú vilja Rússar okkur ekki (án sætis í öryggisráðinu) nema að fá auðlyndirnar okkar!! Norðmenn eru miklu hreinni og beinni!  Þeir vilja að við höldum menningu okkar (og þeirra ) og tungu!

[Greta Björg Úlfsdóttir, 19.10.2008 kl. 03:46]

Já, gamla herraþjóðin okkar er okkur þegar allt kemur til alls hliðhollust.

Svo hefur kannski eitthvað að segja að við erum með hálf-norskan forsætisráðherra, það þykir alla vega og örugglega ekki verra..."en stöt norrmann" segir maður ekki svona?

[Villi Asgeirsson, 19.10.2008 kl. 04:55]

Skemmtileg færsla. Þú hefðir verið kölluð fífl fyrir að skrifa þetta fyrir mánuði síðan, en nú er allt breytt. Mig langar að bjóða þér á www.nyjaisland.is þar sem fólk mun vonandi koma saman og breyta þjóðfélaginu til hins betra.

[Greta Björg Úlfsdóttir, 19.10.2008 kl. 15:32]

Takk fyrir, kíki á það.