inni í litlu húsi

15.12.2007

Betlehemsstjarnan

Lýsir af himni lífsins bjarta stjarna,
leiðsögn, sem aldrei í myrkrinu brást,
til hans, sem er yndi allra jarðarbarna.
Enginn í heiminum göfugri sást.

:,: Ástúðin er hann, inn í hjörtun fer hann.
Umhyggju ber hann í brennandi ást. :,:

Vertu sem barnið, bara fylgdu honum,
byrðum hann léttir af öllum sem þjást.
Veitir þér huggun, hjartað fyllir vonum.
Himinsins stjörnur í augunum sjást

:,: Ástúðin er hann, inn í hjörtun fer hann.
Umhyggju ber hann í brennandi ást. :,:

Lýs milda stjarna leiðir jarðar allar.
Leys hverja deilu, er mennirnir kljást.
Líknaðu þreyttum þegar degi hallar.
Við þröskuldinn hinsta skal sigurinn nást.

:,: Ástúðin er hann, inn í hjörtun fer hann.
Umhyggju ber hann í brennandi ást. :,:

Úlfur Ragnarsson

Um ljóð og lag
Um málverkið hér að ofan

Meginflokkur: Ljóð | Aukaflokkar: Bloggar, Menning og listir, Trúmál og siðferði | Breytt s.d. kl. 11:35 | Facebook

Athugasemdir

Hann pabbi þinn er skáld..og ástríðumaður, eins og þú...

Flott myndin af barnslega einlægu, brosandi Grétu

Anna Benkovic Mikaelsdóttir, 15.12.2007 kl. 11:57

Þessa mynd tók ég út úr annarri, sem tekin var af okkur systrum (yngsta ekki fædd) og mömmu við jólatréð í stofunni í læknishúsinu á Kirkjubæjarklaustri jólin 1956.

Kannski set ég stærri myndina á vefinn seinna.

Greta Björg Úlfsdóttir, 15.12.2007 kl. 12:44

Yndislegt ljóð frá föður þínum Gréta mín. Já endilega stækkaðu myndina og settu hér inn. Takk fyrir þessa fallegu hugvekju frá föður þínum.

Ásthildur Cesil Þórðardóttir, 15.12.2007 kl. 13:29

Hans er þökkin, Ásthildur

Greta Björg Úlfsdóttir, 15.12.2007 kl. 15:09

Sæl og blessuð Greta. Þetta er yndislegt ljóð, ég var einmitt að hlusta á þetta áðan á diskinum með Páli Óskari og Moniku. Tók sérstaklega eftir þessum yndislega texta og opnaði hulstrið til að athuga hver hefði samið textann. Eftir hlustunina ákvað ég að kíkja á bloggin smá stund (í lánstölvu því mín er biluð ). Dásamleg ljóð og svo fallega gert á diskinum "Ljósin heima".

Hafðu það gott, ég bið innilega að heilsa. Kemst sjaldan á netið þessa dagana vegna tölvuvandræða (og man ekki lykilorðin mín )

knús og kveðjur

Ragga

Ragnhildur Jóns (IP-tala skráð) 17.12.2007 kl. 12:27

Bæta við athugasemd [Innskráning]

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Höfundur

Greta Björg Úlfsdóttir

...hvað er bak við yztu sjónarrönd?

gretaulfs@gmail.com

Injustice anywhere is a threat to justice everywhere. We are caught in an inescapable network of mutuality, tied in a single garment of destiny. Whatever affects one directly, affects all indirectly.

~ Martin Luther King, Jr.