Endurtekin bloggfærsla

The various religions are like different roads converging on the same point. What difference does it make if we follow different routes, provided we arrive at the same destination.

- Mahatma Gandhi

Og viðbót, frá sama manni:

Truth is by nature self-evident. As soon as you remove the cobwebs of ignorance that surround it, it shines clear. 

The spirit of democracy is not a mechanical thing to be adjusted by abolition of forms. It requires change of heart. 

I like your Christ, I do not like your Christians. Your Christians are so unlike your Christ. 

Meira af svo góðu HÉR. 

Jólastemning 2007

Aðfangadagskvöld: Mamma og pabbi opna pakkana sína :

 

 

 

 

 

 

 

 Í rólegheitum heima hjá mér á jóladag:

 

Jólatréið mitt!

 

 

 

 

 

 

 Jóladót í bland við hversdagsskrautið !

Jólatrésskrautið mitt: Jólasveinninn og snjókallinn eru úr þunnu vaxi og frá því rétt eftir seinni heimsstyrjöld. Jólakúlan með bangsanum er álíka gömul og hefur alltaf verið "mín" jólakúla. Litla bleika hreindýrið með hvítu hornin keypti ég í Skotlandi þegar strákarnir mínir voru litlir. Jólasveinapabbann og -mömmuna bjó ég til í "foreldraföndri" á leikskólanum Stekk á Akureyri. Gyllta valhnetuskrautið bjó ég til að gamni mínu, svona var til heima þegar ég var lítil. Hvítu englana gaf mamma mér, gylltu englana keypti ég í Skagfirðingabúð á Króknum.

 

 

Hljóða nótt! Heilaga nótt!

Þýðinguna á "Stille nacht" í færslunni hér fyrir neðan fann ég á netinu, og hélt að  sú þýðing væri þýðing Matthíasar Jochumssonar; þar (á netinu) var hún birt án þess að höfundar væri getið. Í gærkvöldi hlustaði ég á plötu með söng Sígríðar Ellu Magnúsdóttur. Þar söng hún "Hljóða nótt! Heilaga nótt!"  í réttri þýðingu Matthíasar og ætla ég að birta hana hér fyrir neðan.

Ég hef því miður enga hugmynd um eftir hvern fyrri þýðingin er, gaman væri að frétta um það. :

 

 

 

 

 

 

 

 

 

 

 Hljóða nótt! Heilaga nótt! 

 

Hljóða nótt! Heilaga nótt!

Hvílir þjóð þreyttan hvarm,

nema hin bæði, sem blessuðu hjá,

barninu vaka með fögnuð á brá.

Hvíldu við blíðmóður barm.

 

Hljóða nótt! Heilaga nótt!

Hjarðlið, þey, hrind þú sorg.

Ómar frá hæðunum, englanna kór, 

"yður er boðaður fögnuður stór;

Frelsari í Betlehemsborg."

 

Hljóða nótt! Heilaga nótt!

Jesú kær, jólaljós

leiftrar þér, guðsbarn, um ljúfasta brá,

ljómar nú friður um jörðu og sjá;

himinsins heilaga rós!

 

 Þýðing  Matthíasar Jochumssonar á "Stille Nacht, Heilige Nacht"

Nóttin helga - málverk eftir Carl Bloch 

Drengur með draum í augum

Elsku pabbi,

- megi þér batna sem fyrst.

- - -

Blessuðum pápa mínum líður betur núna, eftir að hafa fengið 2 lítra af vökva í æð á bráðamóttöku Landspítalans. Hann þarf að vera duglegri að drekka og við hin að vera duglegri að passa upp á að hann geri það. Læknar eru nefnilega langt í frá að vera þægustu sjúklingar í heimi!

Gleðileg jól !

HLJÓÐA NÓTT

Hljóða nótt, heilaga nótt.
Hvílir barn vært og rótt.
Betlehemsstjarnan með blikinu, skær,
boðar um jörðina tíðindin kær.
:,: Mikil er himinsins náð.:,:

Hljóða nótt, heilaga nótt.
Heimi í sefur drótt.
Víða þó hirðarnir völlunum á
vaka í myrkrinu fé sínu hjá;
:,: beðið er sólar og dags. :,:

Hljóða nótt, heilaga nótt.
Himnesk skín ljósagnótt.
Engillinn fagur með orðin svo hlý
ávarpar mennina rökkrinu í:
:,: Lausnarinn fæddur nú er! :,:

Hljóða nótt, heilaga nótt.
Hjarðmenn burt fara skjótt.
Blíðasti drengur með blessun og frið
brosir í jötunni gestunum við,
:,: helgandi fjárhúsið lágt. :,:

Hljóða nótt, heilaga nótt.
Hjörtu glöð bærast ótt.
Vitringar, komnir um víðustu lönd,
vegmóðir leggja í frelsarans hönd
:,: reykelsi, myrru og gull. :,:

Hljóða nótt, heilaga nótt.
Háleit orð spyrjast fljótt.
Krjúpa í lotningu kotið og höll.
Konungi alheimsins fagnar þjóð öll.
:,: Guði sé vegsemd og dýrð! :,: 

 

Ég óska öllum bloggvinum mínum og öðrum gleðilegra jóla, þakka góðar heimsóknir á árinu sem er að líða og óska öllum farsæls nýs (blogg)árs! 

Ætli jólasveinninn þori í heimsókn til ofurfemínista?

Jólahjörtu

Sem betur fer er ég nú orðin svo góð af flensunni að ég gat farið til pabba og mömmu í gær og lokið við að skreyta þær piparkökur sem eftir voru um daginn.

Á meðan lúrði pabbi inni í rúmi, til þess að fá sig góðan og geta notið jólanna fyrir norðan með systrum mínum og þeirra afkomendum.

Þau fá skreytt hjörtu à la pabbi og Greta um þessi jól, eins og undanfarin jól.

Öryggi um jólin

elskan mín þú þarft aldrei
að hafa áhyggjur af öryggisleysi
það eru mál sem englar sjá um
hættu að hamast í slökkvaranum
það mun aldrei kveikja á perunni
það er nóg að eiga eldspýtur
því englar elska kertaljós

Úlfur í sauðargæru...

...og alvöru jólasveinn (í plati)...

Leap of Faith - are you ready for a miracle?

Góð mynd til að horfa á um jólin, ef þið getið fundið hana einhvers staðar. Og ágætt fyrir þá sem sáu hana í kvikmyndahúsi á sínum tíma að rifja hana upp.

Myndin fjallar um falsspámann sem ferðast um Bandaríkin með sirkus sinn. Ég ætla ekki að eyðileggja spennuna í atburðarásinni með því að segja meira. Myndin er bráðskemmtilega, eins og flest sem Steve Martin kemur nálægt, en með alvarlegum undirtón. Hér er sitthvað um myndina af International Movie Database: Leap of Faith.

Hver var Jesús?

Enn leitaði ég á náðir Wikipediu með erfiða spurningu og þetta hafði ég upp úr leitinni:

Quest for the historical Jesus

Gospel of Luke

Luke the Evangelist 

Early Christianity 

We will survive!

Dansleikur

orð eru

mælistikur

á mannkynið

 

stóryrði á

angurgapa

utangarðsmenn

 

smáorðin

ýta þeim íturvöxnu

út í flauminn

 

af og frá að

þeim leyfist að

dansa á brúninni

 

lostafullan tangó

tignarlega kvadrillu

tregablandinn vals

 

þó sumir telji sig

fara eftir línu

einkum

 

í fallinu. 

 

Geirlaugur Magnússon: N er aðeins bókstafur, 2003 

Vive la France!

Þetta myndband er líka býsna gott: SMELLA HÉR

Ég tek undir það sem Reza Aslan segir í lok myndbandsins.

Ekki vildi ég hins vegar lenda fyrir nöglum konunnar sem talaði fyrir hönd "fylgismanna Krists" (Christ´s followers)!  

Af (Þor)Lákum, - einum helgum og öðrum þokkaminni

Nú rennur senn upp Þorláksmessa að vetri, sem er annar af tveimur messudögum Þorláks Þórhallssonar, biskups, eina verndardýrlings okkar Íslendinga. Annar messudagur hans er Þorláksmessa að sumri, 20. júlí.

Þorlákur var vinsæll meðal íslenskrar alþýðu, svo sem sjá má af því að leyfð voru áheit á hann sem helgan mann á Alþingi 1198 og hann lýstur þar helgur maður árið eftir. Það var þó ekki fyrr en 14. janúar 1984 að Stjórnardeild sakramenta og guðsdýrkunar í Páfagarði lýsti því yfir að Þorlákur helgi væri verndardýrlingur Íslands, með samþykki Jóhannesar Páls II. páfa

Ekki hafa allir Þorlákar notið slíkra vinsælda hér á landi. Eftirfarandi er tekið upp úr "Skruddu", bók afa míns, Ragnars Ásgeirssonar, bls 266-67:

"Símon Dalaskáld* hafið óbeit á flestum Þorlákum og kemur hún víða fram í vísum hans. Höfðu einhverjir Þorlákar reynst honum skæðir keppinautar í kvennamálum. Víkur hann að því í þessari vísu:

Tæla frá mér tróðurnar -

tíðum - silkibanda.

Þokkasmáir Þorlákar,

þeir mér stá til bölvunar. 

 

Frá öðru ævintýri sínu, sem endaði sorglega fyrir hann, segir hann svona:

 

Ég við helgan aftansöng,

um sem myndast bögur,

settist niður seims hjá spöng,

sem var ung og fögur.

 

Þangað kom einn Þorlákur,

þetta banna vildi,

ekki seinn, og sá strákur

sundur okkur skildi.

 

Hér í veröld víðast hvar

vífnir jafnan strákar.

Eru mér til ömunar

ávallt þessir Lákar.

 

Símon átti bróður sem hét Þorlákur, hann fór til Ameríku og settist þar að. Um hann kvað Símon:

 

Minn er bróðir blessaður,

bæði hýr og glaður.

Þó hann heiti Þorlákur

þá er hann bezti maður.

 

Víðar en hjá Símoni kemur ótrúin á Þorláksnafninu fram. Eitt dæmi um það má finna í níðvísum Páls Ólafssonar um séra Björn á Dvergasteini. Þegar Páll hefur reitt upp hnútasvipu níðsins að séra Birni, klykkir hann út með þessu:

Og það - að vera Þorláks son -

Það tekur nú yfir! "

- - -
*Símon Dalaskáld (1844-1916) var skáld og flakkari.

- - - 

Ef til vill má merkja að nafnið Láki hafi enn þótt heldur neikvætt hér á landi fram á seinustu öld á því að svartálfi einum, í erlendri bók sem ætluð var ungum börnum, var gefið nafnið Láki í íslenskri þýðingu. Var bókin einfaldlega látin heita Láki og síðan var mynd af svartálfinum óþekka undir. Þykist ég viss um að margir á mínum aldri og yngri muni vel eftir þessari bók. Lílega er hún ekki lengur lesin fyrir íslensk börn vegna hættu á því að hún leiði þau til fordóma.

HÉR er að lokum tengill á fróðleik um einn Láka sem notið hefur nokkurra vinsælda á Íslandi - sá hafði sér það ef til vill til framdráttar að vera amerískur, sem löngum hefur þótt nokkuð varið í hérlendis.

- - - 

Myndin af líkneski Þorláks helga sem fylgir færslunni er fengin að láni af ÞESSUM vef. 

Vísa um presta - og sitthvað um klæðnað þeirra

Það var siður fyrrum hér á landi, að prestar gengu daglega í hempum sínum, og eins voru þeir í þeim á ferðalögum, ýmist gangandi eða ríðandi. Þess siður mun hafa lagzt niður snemma á nítjándu öld, en þá var um þetta kveðin eftirfarandi vísa í Árnessýslu:

Á Suðurlandi sjást nú klerkar svartir fáir.

Þeir eru orðnir grænir, gráir,

gulir, hvítir, rauðir, bláir.

Sögn Helgu Halldórsdóttur á Dagverðará.

Úr "Skruddu" Ragnars Ásgeirssonar, 3. bindi, bls. 254

Skyldu svartir klerkar enn sjást á Norðurlandi? 

Eitt sinn fylgdist ég með presti útskýra hökla kirkjunnar fyrir skólabörnum í kirkjuheimsókn. Prestur sá, sem einnig er fyrrverandi kennari (með kennararéttindi úr Kennaraskólanum, sem þá hét), útskýrði klæðnaðinn þannig að hann ætti að tákna að sá sem klæðist honum kemur fram sem þjónn Guðs frammi fyrir altari hans, en ekki sem sú persóna sem hann er sjálfur. Hann felur sína eigin persónu, eða skilur hana eftir, þegar hann íklæðist höklinum. Þess vegna afklæðist hann höklinum þegar hann flytur prédikun sína, því hún er samin af honum sjálfum samkvæmt hans skilningi á Guðsorðinu, og einnig klæðist hann höklinum aðeins við helgiathafnir í kirkju, en aldrei utan hennar.

Utan kirkju kjósa margir prestar nútímans að bera kraga sem gefur mönnum til kynna að þar sé prestur á ferð, vilji þeir til hans leita. Svarta hempan og rykkilínið er hins vegar forn klæðnaður að uppruna og pípukraginn var bæði virðingartákn veraldlegra og geistlegra fyrirmenna fyrr á öldum.

Ef til vill þarf engan að undra að "svörtum presti" gangi illa að greina á milli embættismannsins og bloggarans í sér. Ætli hann afklæðist ekki hempunni samt sem áður ef hann bregður sér í fjallið á skíði?

Þegar piparkökur skreytast

Í dag skreytti ég piparkökur með honum pápa mínum. Hingað til höfum við skreytt upp úr heilli dós af kökum og mátt sjá afrakstur í formi prímadonnu-piparköku-skreytinga-listaverka. Því miður held ég að við höfum valdið múttu svolitlum vonbrigðum í ár, því bæði erum við hálflasin þessa dagana og vorum ekki til stórræðanna. Í ár varð skreytingin samvinnuverkefni, sem við mörðum af á 32 stk piparhjörtu með glasúr í fjórum litum.

 

 

Hvenær byrjuðu jólin?

Á aðventuhátíð í Áskirkju í kvöld benti Þráinn Bertelsson viðstöddum á klaufalega rangfærslu í fjölmiðlum:

Í október byrjaði að heyrast í fjölmiðlum landsins eftirfarandi auglýsing: Jólin byrja í IKEA.

Þetta er bull og vitleysa.

Jólin byrjuðu ekki í IKEA í október 2007.

Þau byrjuðu í Betlehem fyrir rúmum 2000 árum og auglýsingin var svona:

Ég boða ykkur mikinn fögnuð! 

Góða nótt!

P. s Munið líka að það fer betur á því að hafa rammann ekki dýrari en myndina sem fer í hann.