Sjaldan launar kálfur ofeldi

 

Svo segir gamalt íslenskt máltæki.

Til eru sögur um það þegar menn hafa reynt að skapa sem væru þeir guðir. Slík sköpunarverk reyndust yfirleitt sköpurum sínum ofviða og fóru algjörlega úr böndunum.

Eitt frægasta dæmið um slíkan óskapnað er sagan um Frankenstein, rituð af breska rithöfundinum Mary Shelley, fyrst gefin út 1818 án höfundarnafns.

Davíð: Varaði ítrekað við að bankar væru í hættu

Tilvitnun dagsins

Quote of the Day
All truth, in the long run, is only common sense clarified.
Thomas Huxley

Terroristar

 

 

 

Hér er gömul mynd af hryðjuverkamönnunum tveimur sem ég ber ábyrgð á að hafa komið í heiminn. Annar þeirra er þar að auki lítill Skoti ("A Wee Scot") þar sem hann er fæddur í Skotlandi. Hann líkist samt ekki mr. Brown á nokkurn hátt.

Bara svona til að vera memm.

Lög um einkabanka

Það kom fram í máli Geirs Haarde í viðtalinu við Sigmar í Kastljósinu að Seðlabankinn hefði á árinu beint þeim tilmælum til ríkisstjórnarinnar að lög um einkabanka yrðu hert og svigrúm þeirra takmarkað, umfram lög EES um bankastarfsemi sem farið hefur verið eftir. Við þessu var ekki orðið, enda var á forsætisráðherra að heyra að slíkt hefði síst verið til vinsælda fallið í þjóðfélaginu í þá daga.

Núna, í ljósi seinustu atburða, væri fróðlegt að vita hver afstaða hinna einstöku ráðherra hafi verið til þessa máls? Skyldi það nokkurn tíma fást upplýst hverjir hafi verið með því að taka þessa ákvörðum, og hverjir á móti. Ég á ekki von á því.

Guð blessi Ísland

"Við munum ekki láta kúga okkur!"

- Geir H. Haarde

22. október, 2008

 

Stattu við stóru orðin Geir!

 

Misskilningurinn var sannleikur - hvað sögðu þeir

Athyglisvert að horfa á þessa fréttaskýringu á visir.is 14. mars, 2008 nú eftir á.

Samtal við formann stjórnar Seðlabanka Íslands 18. september

Íslendingar öfundsverðir 21. september

Geir um Davíð 28. september

Forseti Íslands, Glitnir og Ísland 3. október.

Kompás

Frábær Kompásþáttur í gærkvöldi. *****

Á Íslandi er hvorki stríð né skömmtun

 

 

Ég heimsótti unga vini mína frá Serbíu í gærkvöldi.

Þeim finnst ástandið hér á Íslandi núna "pís of keik" miðað við það sem þau upplifðu í  heimalandi sínu á meðan stríðið geisaði þar, og jafnvel miðað við ástandið í landinu fyrir þann tíma, þegar vörur voru skammtaðar o.s.frv. Enda hafa þau alltaf verið ráðdeildarsöm. Þau eru búin að búa hér í 8 ár og minnast þess að hafa undrast "lífsgæða"kapphlaupið hér þegar þau komu, og ekki hefur ástandið batnað í þeim efnum árin sem þau hafa búið hér.

Það var afar áhugavert að hlusta á þau og gæti margt ungt fólk á Íslandi í dag örugglega haft gott af að heyra frásagnir fólks sem hefur kynnst raunverulegri örbirgð og hörmungum.

Þau hafa komið sér vel fyrir hér á Íslandi og hafið nýtt líf. Á þeim bænum er ekki kjarkleysinu fyrir að fara, heldur einkennir þau dugnaður og bjartsýni, þrátt fyrir það að við blasi erfiðir tímar á Íslandi.

Gott

Mér er létt að loksins skuli eitthvað vera farið að gerast. Þessi biðstaða var farin að taka aðeins á taugarnar. Ekki þó svo að ég væri illa haldin sjálfrar mín vegna, en maður gerir sér grein fyrir hvað er í húfi.

Maður var hálfhræddur um að ríkisstjórnin væri að springa eftir svipnum á ráðherrunum að dæma í gærkvöldi og framkomunni við fréttamenn þegar þeir gengu af fundi í ráðherrabústaðnum. En það hefði auðvitað verið algert ábyrgðarleysi að leyfa slíku að gerast, á svo erfiðum og viðkvæmum tíma þegar skjótra aðgerða og ákvarðana er þörf, til þess að ekki fari allt í kaldakol hér hjá okkur.

Ég fagna þessari frétt, þó það sé ógaman að verða að fá slík lán. Vænti formlegrar yfirlýsingar frá ríkisstjórninni fljótlega um málið.

Heilræði

 

 

 

 

Úr pistli sem ég rakst á í The Daily Telegraph (þegar ég setti "Iceland" í leit kom hann fyrstur upp), og mér fannst innihalda ágætt heilræði fyrir okkur í dag. Nenni ekki að hafa fyrir að þýða þetta, það skilja svo margir ensku hvort sem er, - here goes:

"On Sunday I'm back in London, hoping to see The Beautiful People, one of the great plays born out of the Great Depression. William Saroyan, prolific playwright and novelist, is another neglected master. He has a message for us all in these febrile times:

"Try to learn to breathe deeply, really to taste food when you eat, and when you sleep really to sleep. Try as much as possible to be wholly alive with all your might, and when you laugh, laugh like hell. And when you get angry, get good and angry. Try to be alive. You will be dead soon enough."

Cut it out and stick on the fridge door. I have."

Pistillinn er eftir Gyles Brandreth, sem mun vera glæpasagnahöfundur, tengill á pistilinn er HÉR.

Myndin fallega er tekin af bloggvinkonu minni Ásthildi Cesil á Ísafirði, ég fékk að hlaða henni niður þegar hún birti hana í blogginu sínu. Ég vona að það sé í lagi að setja hana hér, mig langaði svo til að setja einhverja virkilega fallega íslenska mynd með færslunni.

Garg!

Geir lýsir yfir fullu trausti til Davíðs...!!!

Vangefið!

Hvaða tök hefur maðurinn á Sjálfstæðisflokknum?

Ég trúi því ekki að þar á bæ séu allir jafn hrifnir af DO og formaður flokksins.

Sem stendur með aldavininum frekar en sjálfum sér OG ÍSLANDI!

Þessi stuðningsyfirlýsing + aðgerðaleysið jafngildir pólitísku sjálfsmorði GH. Það er ég nokkuð viss um.

Það mun nefnilega fyrst og femst vera aldavinurinn sem er á mót IMF láni.

Sem virðist þó okkar síðasta haldreipi þessa dagana. Kannski telur DO að verið sé að svínbeygja sig persónulega?

Það hlýtur að koma að því að flokkurinn klofni.

(23/10 - fjarlægði setningu sem stóð hér, því hún var ómakleg. Ríkisstjórnin stendur í ströngu þessa dagana. Svo sjáum við til hvað gerist í næstu kosningum!)

Vísa að öðru leyti til færslu minnar hér fyrir neðan frá í gær um Davíð.

 

Engin niðurstaða enn

Ég viðurkenni...

...að ég hef hingað til ekki leitt hugann mikið að stjórnmálum eða látið mig þau miklu skipta. Það hef ég (ekki) gert í þeirri góðu trú að landinu væri þokkalega stjórnað, þó deilt væri um áhersluatriði.

Nú hefur öll þjóðin heldur betur fengið skell og vaknað upp af værum velferðardraumi við það að við stefnum hraðbyri norður og niður ef ekki verður gripið til róttækra ráðstafana á allra næstu dögum.

Kannski verður þessi þróun mér og mínum líkum aðvörun um að fylgjast betur með og trúa varlegar yfirlýsingum stjórnmálamanna og stjórnvalda. 

Það er eitt af því jákvæða sem vonandi kemur út úr þessu öllu, þrátt fyrir allt. Einnig að við vöknum til meðvitundar sem þjóð um þau gildi sem eru einhvers virði, það er að segja ekki eftirsókn og hlaup eftir tískustraumum, heldur að meta og styrkja fjölskyldubönd, kærleika í mannlegum samskiptum og þá uppsprettu varanlegs auðs og gleði sem náttúra landsins hefur að gefa okkur.

"Við megum aldrei gleyma því að Ísland er stærsta land í heimi."

- Dorrit Moussaieff

Hverjum var um að kenna?

Kenning Agnesar um samsæri seðlabankanna er allfjarstæðukennd.

Og reyndar runnin beint undan rifjum D.O.

Árásir alþjóðlegra auðhringja gegn fjármálakerfum landa eru hins vegar þekktar.En að álíta að seðlabankar viðkomandi ríkja (þar sem þeir auðhringar hafa aðsetur sitt) eigi aðild að þeim finnst mér ansi langsótt. Þá má fjármálaspilling innan þess ríkis að minnsta kosti vera allsvakaleg, ef þessir auðhringar ráða þar lögum og lofum. ( - Meiri en á Íslandi!?)

Í þessari grein sem Nóbelsverðlaunahafinn Paul Krugman skrifaði í The N.Y. Times í mars s.l. segir hann frá því að D.O., seðlabankastjóri Íslands telji að auðhringir bruggi slíkt samsæri gegn Íslandi. Hann leggur í sjálfu sér ekki dóm á þær staðhæfingar, en segist ætla að fylgjast með gangi mála.

Ég vek athygli á því að víða í bloggheimum er vitnað til greinar Krugmans sem hefði hann sett þarna fram eigin kenningu um samsæri gegn Íslandi. Hið rétta er að hann vekur athygli á staðhæfingum D.O. um að slíkt sé í uppsiglingu.

Hafi um slíkt samsæri verið að ræða hefði hins vegar ekki tekist að hrinda því í framkvæmd nema vegna þess að í bankakerfinu voru alvarlegar veilur og það þess vegna galopið fyrir árásum af slíkum toga.

Sérstaklega í ljósi þess að D.O taldi slíkt samsæri í uppsiglingu þykja mér yfirlýsingar hans í Kastljósþættinum fræga undarlegar, þar sem honum mátti vera ljóst að vel væri fylgst með orðum hans af erlendum aðilum.

Hrunið var ráðamönnum í bankamálum sjálfum að kenna, ekki vondum köllum í útlöndum.Það voru þeir sem stóðu ekki vörð um bankana, heldur leyfðu þeim að þenjast út erlendis án þess að gera viðeigandi varúðarráðstafanir.

Hverjum var hrunið að kenna? Þeim sem fengu Agnesi það verkefni að skrifa þessa grein, sem er einfeldningsleg  tilraun til að hvítþvo stjórnendur Seðlabankans og firra þá allri ábyrgðs.

Það er aumkunarvert að halda að við sjáum ekki í gegnum barnalegt yfirklórið í grein hennar.Svona gein kastar ekki ryki í augu landsmanna.

Svo er talað fjálglega um að þjóðin eigi að snúa bökum saman, á sama tíma og okkur er boðið upp á blekkingartilraunir sem þessar.

Halda ráðmenn virkilega að íslenska þjóðin sé svo heimsk að hún gleypi við hverju sem er?

Sveiattan !

Þeir felldu bankana

Af vefsíðu Vísis

Kreppubrandarar: Hvað kallast fimm bankastjórar á hafsbotni?

Góð byrjun. Breska blaðið Daily Mail hefur tekið saman það sem kalla má kreppubrandara til að létta aðeins geðið hjá fólki á þessum síðustu og verstu tímum. Hér eru nokkrir þeirra.

Hvernig skilgreinir þú bjartsýni í dag? Bankastarfsmaður sem straujar fimm skyrtur á sunnudegi.

Afhverju eru fasteignasalar hættir að horfa út um gluggan fyrir hádegi? Svo þeir hafi eitthvað að gera eftir hádegið.

Hver er munurinn á stjórnenda fjárfestingarbanka og dúfu? Dúfan getur enn sett mark sitt á Ferrari-bíl.

Fjármálakreppan hefur komið mér aftur á lappirnar. Það er búið að taka af mér bílinn.

Hvað segir þú við forstjóra vogunarsjóðs sem getur ekki selt neitt? Ég ætla að fá einn Big Mac með frönskum.

Heyrt á bar á Wall Street: "Þessi fjármálakreppa er verri en skilnaður. Ég haf tapað helmingi eigna minna en sit samt uppi með konuna.

Hver er munurinn á Robert Peston viðskiptaritstjóra BBC og guði? Guð heldur ekki að hann sé Robert Peston.

Maður kemur að máli við bankastjóra sinn og segist vilja stofna smáfyrirtæki. Hvernig geri ég það? "Einfalt," segir bankastjórinn. "Þú kaupir stórfyrirtæki og bíður svo aðeins.

Hvað er sameiginlegt íslenskum banka og íslenskum stripplingi? Báðir eru með dýrmætustu eigur sínar frosnar.

Davíð

Ég held að margir Íslendingar séu reiðubúnir að standa við bakið á núverandi ríkisstjórn á þessum erfiðu tímum og fram að næstu kosningum, svo framarlega sem upphafsmaður reiðileysisstefnunnar í bankamálum, Davíð Oddsson, verði látinn víkja úr stöðu bankastjóra í Seðlabankanum.

Auðvitað ættu allir bankastjórarnir að víkja, en Davíð hefur tekið sér húsbóndavald í Seðlabankanum og er að auki sá ráðamaður sem kom á einkavæðingu bankanna í landinu meðan hann var enn forsætisráðherra. Hann hlýtur því að bera mesta ábyrgð á því hvernig komið er og þess vegna er krafan sú að hann fyrst og fremst verði látinn víkja.

Síðan hlýtur krafan að vera sú að þeir sem verða berir að afglöpum í störfum í þágu þjóðarinnar eða vafasömum tengslum við viðskiptalífið verði skilyrðislaust látnir víkja úr starfi fyrir vikið. Og lesandi góður, ekki bera við  fámenninu og skorti á hæfu fólki einu sinni enn. Við eigum fullt af hæfu fólki, auk þess sem sá sem hefur orðið uppvís að slíku er alls ekki lengur hæfur!

Ef ekki verður orðið við þeirri kröfu mun verða krafist stjórnarslita innan skamms. Almenningur í landinu sættir sig ekki lengur við að einn maður deili og drottni á þennan hátt. Nú situr Davíð eins og kóngur í Seðlabankanum og skammtar atvinnuvegunum gjaldeyri eftir eigin geðþótta. Þetta er ekki líðandi.

Ef þeir Sjálfstæðismenn sem sitja við stjórnvölinn í dag ætla að gera sér vonir um endurnýjun lífdaga í næstu kosningum, hvenær sem þær verða haldnar, hlýtur það að vera skilyrði að þeir sýni af sér þá einurð að losa sig við aldavininn Davíð, sem hefur valdið svo miklum óskunda í þjóðlífinu.

Ah...

...þessi kona hefur lag á að bræða mann...

DORRIT(tengill)

"Við megum aldrei gleyma því að Ísland er STÆRSTA land í heimi!"

Ég held að margir muni sakna Dorritar þegar Ólafur hættir.

 

Heimurinn er að breytast

Ég álít, í ljósi síðustu atburða í samskiptum okkar við önnur lönd, að við Íslendingar gerum best í því að hlúa að okkur sjálfum og búa okkur undir að geta verið sjálfum okkur nógir á sem flestum sviðum. Að treysta um of á umheiminn er varlegt, eins og við finnum vel fyrir þessa dagana. Við verðum að treysta á okkur sjálf, fyrst og fremst, það sýnir reynslan okkur.

Annars endum við sem fátækt þróunarland sem önnur betur stæð ríki geta haft í hendi sér, það er að segja meðan þau standa enn af sér efnahagsstorminn sem gerir það að verkum að nú virðist sem þau lönd sem áður töldust hin auðugu og voldugu í heiminum stefni hraðbyri í þrot.

Ég tel það einnig hafa sýnt sig síðustu daga að þau lönd sem við eigum fyrst og fremst að leggja áherslu á að halda góðum tengslum við eru hin Norðurlöndin, þau lönd sem við tengjumst sérstökum menningarlegum og sögulegum böndum.

Það harðnar á dalnum um alla veröld. Við eigum að stefna að því að eiga alltaf hér í landinu nægar forðabirgðir af þeim vörum sem við þufum nauðsynlega á að halda og getum ekki verið án, komi til alvarlegrar heimskreppu, ekki síst vegna landfræðilegrar stöðu okkar. En til þess þurfum við gjaldeyri, þannig að augljóslega verður gjaldeyrisöflun að vera annað megin markmið okkar á komandi árum, í stað þess útstreymis á því sem verið hefur árin á undan. Það er komið í ljós að við höfum eytt margfalt um efni fram á undanförnum árum.

Jafnframt þarf að hlúa að innlendri framleiðslu á vörum fyrir heimamarkað og stefna að því að við getum orðið sem mest sjálfbær um nauðsynjar komi til þess að markaðir lokist og verslun við útlönd verði illmöguleg. Vitanlega verðum við einnig að halda áfram að leita færa til aukins útflutnings á afurðum okkar og gjaldeyrisöflun.

Ennfremur ættum við að nýta þá þekkingu og hugvit sem við búum yfir til að þróa aðferðir við að framleiða efni, til dæmis til nota við framleiðslu á öðrum vörum, úr innlendum hráefnum sem geta komið í stað þeirra sem við í dag teljum okkur tilneydd að flytja inn. Dettur mér í því sambandi í hug frétt á Stöð 2 nýlega þar sem sagt var frá því að beðið væri eftir gjaldeyrisheimild til að greiða pöntun á efnablöndu sem nauðsynleg er í framleiðslu á mjólkurvöru og fleiru. Er ekki hugsanlegt að við gætum í framtíðinni framleitt slíkar vörur sjálf?

Leggja þarf áherslu á að auka við þekkingu á náttúru okkar og þeim vannýttu auðlindum sem hún býr yfir, svo og tækniþekkingu til að vera þess megnug að nýta þá kosti sem skyldi. Og þar á ég ekki eingöngu við raforku. Til þess þurfum við vel menntað fólk, þannig að leggja verður mikla rækt við menntun ungs fólks, og raunar tel ég að við eigum að setja hana í forgang þegar kemur að fjárveitingum. Tími uppbyggðra þjóðvega í hvern krók og kima landsins fyrir risajeppa að þeytast eftir er liðinn. Minnkum hraðann, aukum gæðin!

Við ættum að reyna að læra af reynslu elstu kynslóðarinnar í þessu landi, fólkinu sem ólst upp við aðhald og sparsemi, ekki vegna þess að slíkt væri álitin sérstök dyggð, heldur af illri nauðsyn því annað var ekki í boði.

Kortinu rændi ég héðan.

Þarf einhver að vera hissa á því?

Mér finnst að við höfum orðið okkur til enn meiri skammar og athlægis, með því að hætta ekki við framboðið en útdeila þess í stað rjómapönnukökum!

Heldur það fólk sem vann að framboðinu að öryggisráðið sé einhver saumaklúbbur?

En Íslendingar kunna víst ekki að hætta, þekkja ekki sinn vitjunartíma eins og það hefur verið orðað, heldur göslast áfram í hroka og yfirlæti, jafnvel þó þeir hafi beðið algjört skipbrot á alþjóðlega vísu.

Hvernig væri að halda sig til hlés, sleikja sárin og jafna sig á áfallinu fyst um sinn.

Okkar tími mun koma.

 

Ísland náði ekki kjöri