Nú keppast menn...

...hver sem betur getur við að beina sjónum frá sjálfum sér og að einhverjum öðrum í leitinni miklu að sökudólgum.

Sennilega mun allt innan skamms verða sveipað í annars konar mökk en þann sem orsakaðist af hruninu sjálfu.

Sån´t er livet - på Island.

Ekki grín

Fréttina hér fyrir neðan ætla ég að geyma hér og lesa hana aftur og aftur þangað til ég hef sannfærst um að hún sé ekki afspyrnu lélegur brandari heldur sé efni hennar full alvara og ætlast sé til að maður taki það sem í henni segir  trúanlegt og segi svo já og amen og en krúttlegt.

Álíta sig hæfa til að rannsaka syni sína

Netið

Er ekki hægt að horfa á beina útsendingu frá Alþingi á netinu? Mér fannst ég sjá það einhvers staðar annað hvort á vefsíðu RÚV eða Stöð 2, en finn það ekki núna. Getur einhver frætt mig?

Dauðaþögn

Eftir að hafa fylgst með fréttum í gærkvöldi og í dag verð ég að segja að nú er þolinmæði mín þrotin, er hún þó töluverð.

Forsætisráðherra þumbast við og segir að þetta muni allt koma í ljós síðar. (Hjá móður minni í gamla daga þýddi "við sjáum nú til" yfirleitt "nei").

Menn gefa misvísandi svör, annars vegar íslenski ráðamaðurinn Geir og hins vegar íslensku ráðamennirnir Ingibjörg S. og Árni M. ásamt  fulltrúa  Alþjóðagjaldeyrissjóðsins sem fréttamaður íslensks fjölmiðils ræddi við, um ástæður fyrir vaxtahækkuninni. Það er að segja hvort hún hafi alfarið verið ákvörðun ríkisstjórnarinnar eða hvort hún hafi verið eitt af skilyrðum sjóðsins. Hvor vísar á annan í því efni. Hvers lags bull er þetta? Ekki til þess fallið að vekja með manni traust á starfsaðferðum ríkisstjórnarinnar, svo mikið er víst!

Ráðamenn hafa fengið mikið svigrúm hjá þjóðinni undanfarnar vikur.

Nú er kominn tími til, og þó fyrr hefði verið, að þeir gefi okkur skýr svör um aðgerðaáætlunina og um það hvað er framundan. Þar ríður á miklu fyrir fjölda manns. Að bíða í óvissu er engum hollt, þá er betra að fá að heyra vondu fréttirnar. Um þetta ræddi landlæknir í fréttatíma í gærkvöldi, þá hefur hann bæst í hóp þeirra sem fara fram á

SKÝR SVÖR STRAX!

Ég álít þess utan að með því að hrófla ekki við aldavini sínum sé forsætisráðherrann að fremja pólitískt sjálfsmorð í beinni útsendingu.

Við erum ekki stödd í menntaskólapartýi -

Við erum á leið ofan í öldudal í ólgusjó!

Hvernig væri að gömlu skólafélagarnir reyndu að skilja það?

Eða eru þeir kannski búnir að redda sér svo góðum flekum fyrir áframhaldandi partý að þeir þurfi ekki að hafa áhyggjur af okkur hinum sem aldrei vorum með í því?

Þarf að tala skýrt við fólkið

Ég er að velta því fyrir mér...

Ef fólk ákveður að "hoppa fram af" eins og ég kallaði það í kommenti hér á blogginu, eða kannsi að "hoppa af" það er að segja að hætta að borga af lánunum sínum og flytja úr landi, fær það þá fyrirgreiðslu í erlendum bönkum samt sem áður?

Er ekki allt svo tengt að bankar fái strax upplýsingar um vanskil frá heimalandinu? Alla vega á hinum Norðurlöndunum og á Schengen svæðinu? Yrði maður ekki að fara til Suður-Ameríku með fullt af dollurum upp á vasann eða í einhvern útnára heimsins til að slíkt gengi upp?

Er það þá ekki bara bankabókin og rassvasabókhaldið sem gildir, eins og hér heima? Nix kreditkort, núll lán, engar eignir, plúskort (fyrirframgreitt kort), og debetkort fyrir náð og miskunn síðar o.s.frv.

Vona að einhver geti svarað þessari spurningu minni.

Maður tárast

 

 Litla smáþjóðin í Atlantshafinu, sem sjálf gekk í gegnum viðlíka hremmingar á sínum tíma, er tilbúin að lána okkur.

Maður spyr sig samt, hafa þeir efni á þessu? Þurfa þeir ekki að nota peningana heima fyrir?

Maður klökknar við að lesa þetta

Hjartans þakkir, Færeyingar. Þið eruð bestir.

Færeyingar vilja lána Íslandi

Máltæki dagsins:

Quote of the Day
There is no wealth but life.
John Ruskin

Svo sannarlega umhugsunarvert.

Því miður...

...verð ég að viðurkenna að ekkert af því sem ég horfi nú á gerast í kringum sig kemur mér á óvart. Ég hef verið agndofa undanfarin ár yfir hinum svokallaða uppgangi í þjóðfélaginu, stórhýsi skutust upp úr jörðinni eins og gorkúlur, byggingarkranar gengu nánast allan sólarhringinn, fólk þeyttist um þjóðvegina á manndrápshraða á risajeppum sem kostuðu margar milljónir, flutt var inn grjót og eðalviður í tonnavís, innflutningur á alls kyns vörum sem teljast verða til munaðar (í mínum huga, alla vega) var gengdarlaus og á marga (ekki alla) hafði runnið algjört kaupæði.

Þetta var allt einhvern veginn svo fjarstæðukennt og algjörlega í andstæðu við það sem mér var innrætt í barnæsku. Ég er af þeirri kynslóð sem hóf vegferð sína með því að fá sparibauk sem á stóð "Græddur er geymdur eyrir", mig minnir að það hafi verið gjöf frá Búnaðarbankanum sem þá hét svo. Manni var innprentað að það væri dyggð að spara og eiga peninga í banka, að skulda umfram greiðslugetu væri óráðssía; að lifa á yfirdrætti þekktist ekki mér vitanlega.

Fyrir fæðingu mína hafði "blessað" stríðið fært landinu ástandið og Bretavinnuna, síðan tók "elsku" Kaninn við. Ég er fædd árið 1951 og man því ekki þessa tíma, en ennþá var þó borin virðing fyrir þeim gömlu viðhorfum til peninga sem ég lýsti hér að framan. 

Síðan kom óðaverðbólga. Henni fylgdi brenglun á verðskyni og viðmiðum í peningamálum, þá var um að gera að fjárfesta í steinsteypu (sem mér hefur alltaf fundist forljótt byggingarefni!) og skulda sem mest því lánin voru ekki verðtryggð, að spara varð fíflalegt, á því græddi enginn.

Svo tók pappírsbólan við. Fáir virtust muna eftir því að yfirdráttur er ekki raunverulegur höfuðstóll, skuldir eru ekki eignir nema á bankamáli, og enn var steinsteypuhugsunin við lýði, samhliða pappírsauðnum.

Græðgisvæðingin ríkti um allan hinn vestræna heim, en hvergi held ég að hún hafi verið eins áberandi og hér á landi, há hinum nýríku Íslendingum, þá er ég að tala um þjóðina sem heild, en ekki einstaklinga sem slíka. Þjóðin gleymdi sér á eyðslufylleríi og eftirsókn eftir vindi.

Nú standa eftir steyptir grunnar og byggingarframkvæmdir sem ekki eru til peningar til að klára. Eignir sem lokið hefur við eru skuldsettar upp í topp. Skuldir hækka, fólk missir unnvörpum vinnuna og sér ekki hvernig það á að fara að því að framfleyta sér og sínum á næstu mánuðum.

Á platta sem ég fann í Góða Hirðinum og hangir í eldhúsinu mínu stendur þessi speki:

"Undgå kredit

Lev trygt og frit."

Vonandi rís fuglinn Fönix enn úr öskunni.

Vaxtahækkun vegna IMF

I´m gonna spend, spend, spend!

Kona er nefnd Vivian Nicholson. Árið  1961 vann hún það sér til frægðar að vinna £152,319, hæstu upphæð sem þá hafði sést í getraunum breska fótboltans. Þegar blaðamaður spurði hana hvernig hún hygðist verja fénu varð hún fræg að eilífu í Bretlandi þegar hún svaraði:

"I´m gonna spend, spend, spend!"

Sem útleggst: Ég ætla að eyða, eyða, eyða. Kannski frekar: versla, versla, versla! Hljómar dálítið eins og Íslendingur í "erlendis"ferð, ekki satt?

Og hún stóð við orð sín. Svo rækilega að um tíma lifði hún á féló á Möltu, af öllum stöðum, ef mig misminnir ekki.

Eftir það vann hún sig upp frá þeim stað í tilverunni, og naut við það góðs af þeirri frægð sem henni hlotnaðist af eyðslunni, meðal annars með því að skrifa (ásamt öðrum) ævisögu sem kom út 1977.

Svo fræg er konan að gerður hefur verið um hana söngleikur (eftir leikriti frá 1998) sem að sjálfsögðu heitir "Spend, spend, spend". Hann var frumsýndur 1999 og er enn sýndur og gerir það gott víðsvegar um landið samkvæmt heimasíðu. Um söngleikinn og frægðarferil Viv má lesa hér.

Wikipedia: Spend spend spend

Ja hérna sagði kerlingin og hristi hausinn...

Var að horfa á Björgólf í Kastljósinu.

Veit fyrir víst að menn eiga eftir að ræða þetta viðtal í tætlur hér á blogginu. Vildi bara koma þeirri skoðun minni á framfæri við lesendur.

* Tek fram að myndskreytingin stendur ekki í neinum tengslum við efni færslunnar.

Þörf ráðstefna fyrir okkur - meir nú en nokkru sinni

Þetta hefur verið sköruleg ræða hjá Árna Páli.

Líka gott að heyra að Geir hafi óskað eftir sérstökum fundi forsætisráðherranna um málefni Íslands.

Vonandi fáum við bæði fjárhagslegan og siðferðilegan stuðning frá Norðurlandaþjóðunum út úr þessari ráðstefnu, ekki veitir af. Best væri ef þeir væru á þeim nótum að fordæma Breta opinberlega, en óvíst hvort þessar þjóðir séu tilbúnar að ganga svo langt gegn jafn voldugri þjóð.

 

Eru nú fyrst að átta sig á alvarleika málsins

Ánægjulegt

Loksins ánægjuleg frétt frá Palestínu. Ekki veitir af.

Fyrsti heimaleikur Palestínu

Fáránleg fyrirsögn

Mér finnst fyrirsögnin fáránlega orðuð.

Á ekki Samfylkingin, sem eykur fylgi sitt, fimm ráðherra í ríkisstjórn, eða hvað, þó forsætisráðherra og aðrir sex ráðherrar séu Sjálfstæðismenn? Auk þess sem aðeins 55% þeirra sem spurðir voru svöruðu spurningunni, samkvæmt því sem mér var tjáð hér á blogginu, þannig að þessi könnun er ekki marktæk. Þessa var þó ekki getið í frétt mbl.is. Auk þess sem spurningin virðist hafa verið um fylgi flokkanna hvers um sig, ekki hvort menn styddu ríkisstjórnina.

Leiðrétting: Sex og sex ráðherrar, ruglaðist á Kristjáni Möller, vegna þess að mér hefur alltaf fundist hann svo framsóknarlegur (eða kannski bláleitur), hann er alla vega frá Siglufirði. - Þess þá heldur!

Mér finnst svona uppsláttur í fyrirsögn á mbl.is villandi og bera vott um óvönduð vinnubrögð. Svo sem ekki í fyrsta sinn sem ég gagnrýni blaðamenn síðunnar fyrir slíkt.

Ég held að margir styðji ríkisstjórnina fram að næstu kosningum. Svo kemur í ljós hvenær þær verða haldnar og hver útkoman verður úr þeim.

Fyrst þegar ég las þessa fyrirsögn var ég að vona að meiningin í henni væri að stjórnarandstaðan hefði lýst yfir stuðningi við aðgerðir ríkisstjórnarinnar síðustu daga, sem mér fyndist vel. En til þess hefur að vísu ekki nægilega mikið komið fram um gang samningaviðræðna. Slík stuðningsyfirlýsing myndi væntanlega ekki koma fram nema búið væri að leggja fram skilyrðin og þing búið að koma saman.

Minnihluti styður stjórnina

Góð heilsa er gulli betri

Elskulegir samlandar mínir!

Ég bið ykkur að minnast þess á þessum síðustu tímum að góð heilsa er gulli betri.

Því þó á móti blási, fólk missi vinnuna og við mörgum blasi jafnvel gjaldþrot, þá er það alls ekki eins hræðilegt og ætla mætti ef fólk á ennþá góða heilsu, kjark og þor til að takast á við erfiðleikana, að maður tali nú ekki um ef það býr svo vel að eiga líka í farteskinu góða menntun og hugkvæmni,slíkt verður ekki frá neinum tekið, þó eignir fari fyrir lítið.

Þess þá heldur ef fólk á fjölskyldu, maka og börn, allt það sem gerir lífið ennþá frekar þess virði að lifa því, þrauka og berjast.

Gleymið ykkur ekki í reiði og ásökunum, áhyggjum eða barlómi. Látið ekki lýðskrumara sem sjá skrattakolla í hverju horni telja úr ykkur kjarkinn.

Berjist fyrir bættu þjóðfélagi, ekki með flumbrugangi og hávaða, heldur takið á málum af einurð og hófsemi. Það þýðir þó ekki að ráðamenn skuli ekki sæta ábyrgð. Það mun koma að skuldadögum.

Jesú sagði:

"Því segi ég yður: Verið ekki áhyggjufull um líf yðar, hvað þér eigið að eta eða drekka né heldur um líkama yðar, hverju þér eigið að klæðast. Er lífið ekki meira en fæðan og líkaminn meira en klæðin? Lítið til fugla himinsins. Hvorki sá þeir né uppskera né safna í hlöður og faðir yðar himneskur fæðir þá. Eruð þér ekki miklu fremri þeim? Og hver yðar getur með áhyggjum aukið einni spönn við aldur sinn?  Og hví eruð þér áhyggjufull um klæðnað? Hyggið að liljum vallarins, hversu þær vaxa. Hvorki vinna þær né spinna. En ég segi yður: Jafnvel Salómon í allri sinni dýrð var ekki svo búinn sem ein þeirra. Fyrst Guð skrýðir svo gras vallarins sem í dag stendur en á morgun verður í ofn kastað, skyldi hann þá ekki miklu fremur klæða yður, þér trúlítil!
Segið því ekki áhyggjufull: Hvað eigum vér að eta? Hvað eigum vér að drekka? Hverju eigum vér að klæðast? Allt þetta stunda heiðingjarnir og yðar himneski faðir veit að þér þarfnist alls þessa. En leitið fyrst ríkis hans og réttlætis, þá mun allt þetta veitast yður að auki. Hafið því ekki áhyggjur af morgundeginum. Morgundagurinn mun hafa sínar áhyggjur. Hverjum degi nægir sín þjáning." 

Mattheus 6, 25-34.

Rakst á þetta áðan...

Queen - Who Wants To Live Forever (Live At Wembley 1986)

Verðum við ekki bara að taka þetta á húmornum?

Rauðu riddararnir

Mér er nú orðið farið að þykja allmargir vilja nota núverandi ástand í þjóðmálum okkar til að slá sjálfa sig til riddara meðal reiðs almennings.

Metnaðarfullur þingmaður biður um lán í Noregi upp á sitt eindæmi og hótar byltingu ef skrifað verði undir kúgunarkjör við IMF, - sem forsætisráðherra hefur sagt að verði ekki gert.  Annar, fyrrverandi þingmaður, ráðherra og sendiherra sem löngum hefur notið góðs af kerfinu, gengur nú í endurnýjun lífdaga með vandlætingu að vopni í stjörnuviðtali í sjónvarpsþætti og ræðuhöldum á útisamkomu.

Fréttamaður gerist svo aðgangsharður við forsætisráðherra að hann leyfir honum helst ekki að svara þeim spurningum sem hann leggur fyrir hann, heldur þylur upp úr sér sínum eigin heimatilbúnu fullyrðingum sem svörum.

Þess utan blása beittir pennar í herlúðra í bloggheimum og vilja leggja rækt við reiðina.

Einhvern tíma hefur svona atferli verið kallað stjörnustælar.

Ég hef ákveðið að ég ætla ekki að láta berast með æsingarstraumi múgsefjunar eða  taka þátt í hernaðarhugleiðingunum. Ég hef of mikla reynslu í ýmis konar hremmingum til að vilja æsa mig yfir peningum. Hér geisar sem betur fer ekki alvöru stríð, þó allt virðist stefna í að æst verði til fjöldaslagsmála niðri í bæ. 

Ég vil samt ennþá að stjórn Seðlabankans segi af sér, en ég vil afsögn - ekki afhausun.

Hraustur hundur

"Stór hundur sem hefur lent í litlum búk".

Orð að sönnu, sem þessi saga sýnir.

Íslendingar mega taka hann til fyrirmyndar .

Skoski terrier-hundurinn hefur fengið gælunafnið "little diehard", sem Freddie sannaði rækilega. Tegundin er, nafninu samkvæmt, mjög vinsæl í Skotlandi og sér maður hana oft á strætum þar.

Mér finnst reyndar hvíta afbrigðið fallegra.

Síða á Blogger um skoska terrierinn: Scottish Terrier and Dog News. Þar má sjá margar skemmtilegar myndir af hundunum og eigendum þeirra.Ég sá þó hvergi söguna af Freddie á henni.

Fundu hund á sundi langt frá landi