Gaza

The Mentos Booby Trap

Hér er tengill á það hvernig búa má til "booby trap" úr flösku af diet-kóki og einni "Mentos" (sælgæti). 

Aðvörun:  Ekki blanda kóki og Mentos saman innvortis, af hverju ætti að vera augljóst við að horfa á myndbandið með hrekknum (booby trap)! Sem sagt, ekki borða Mentos og drekka kók með, og alls ekki að gefa börnum þetta tvennt saman, það getur haft vægast sagt óþægilegar afleiðingar.

Sagt er að barn hafi dáið í Brasilíu af völdum þess að blanda þessu tvennu saman. Þetta er þó óstaðfest, að minnsta kosti er slíks atburðar hvergi getið í fréttum við nánari eftirgrennslun Hoax Slayer, sem er vefsíða aðila í Ástralíu sem hefur tekið það upp hjá sjálfum sér að fylgjast með ýmsu sem fram fer á alnetinu (e.k. sjálfskipuð netlögga), m.a. að sannreyna sannleiksgildi útsendra fjöl-tölvupósta með óstaðfestum hryllingssögum, ógrunduðum aðvörunum og fleiru slíku. Hér er tengill á síðu um hina meintu banvænu blöndu af kóki og mentos: Coke and Death Warning E-mail

Alla vega, ekki gefa börnunum ykkar þetta tvennt í einu, hvað sem öðru líður er það ávísun á magapínu!

Er til góð þýðing á "booby trap" á íslensku? Ekki dugar að kalla það "fíflagildru",  eða hvað? Eða kannski "hrekkjagildru"?  

Hér er tengill á gildrur sem eru ekki eins saklausar og sú sem ég tengi á hér að ofan, þessar eru í mörgum tilvikum dauðagildrur sem hægt er að rekast á í gönguferð úti í náttúrunni erlendis (sér í lagi í suðvesturhluta BNA, nánar til tekið, - hversu klikkað getur fólk orðið?) sé maður óheppinn. Sem betur fer ekki á Íslandi! Ennþá.

Alþekkt er að búa til dauðgildrur í hernaði, sérstaklega í skæruhernaði, eru ekki jarðsprengjubelti dæmi um nokkurs konar dauðagildrur? Wikipedia: Booby Trap.

Um Hoax-Slayer 

Framtíðarsýn

Ég fann tengilinn á myndbandið hér á eftir í athugsemd Einars á bloggi Egils Austurlandafara. Mig langar til að setja hann hér inn svo fleiri geti hlustað á það sem sagt er á því því um íslam og múslima.

Bara ef allir gætu tileinkað sér hugsunarhátt frjálslynda rithöfundarins Dhiyaa Al-Musawi frá smáríkinu Bahrain á Arabíuskaga, sem rætt er við á þessu myndbandi.

Hér má lesa viðtalið (á ensku). 

Velferðargrísirnir

Frétt, sem breska dagblaðið The Sun birti 1. október, 2005,  um svína-dagatölin, svína-leikföngin, svína-glerfígúrurnar og tissjúboxið með mynd af Bangsímon og grislingnum sem starfsmenn á velferðarsviði borgarstjórnar í Dudley (íbúatala 2001: 194,919) í Mið-Englandi höfðu skreytt skrifstofur sínar með, en urðu að að breiða yfir eða fjarlægja af skrifborðum sínum af tillitssemi við múslímskan vinnufélaga sinn, má lesa HÉR. 

Múslímskur starfsmaður hafði kvartað við yfirmenn sína yfir því að sviðinu hefðu borist svo kallaðir "stress relievers" það er að segja gúmmíkúlur, í þessu tilviki bleikar og í laginu eins grísir, sem á að kreista til að slaka á (kreista-slaka-kreista-slaka o.s.frv.), á þeim tíma sem Ramadan (mestu hátíðahöld múslima) fór í hönd. Eins og kunnugt er mega múslimar ekki borða svínakjöt, því samkvæmt trú þeirra eru svín óhrein dýr.

Mjög viðeigandi og fyndin gjöf til starfsmannanna. Það undarlega var að umræddur starfsmaður tók sína gjöf ekki með bros á vör og kreisti hana, eins og vinnufélagarnir, heldur fór og klagaði þá fyrir yfirmönnunum.  Sem ber auðvitað vott um algjört vanþakklæti og skort á skopskyni. Þó var svo sem ekki við öðru að búast,  það er öllum kunnugt að sumt fólk er einfaldlega óalandi og óferjandi og kann ekki að taka saklausu gríni.

Þetta alvarlega mál urðu auðvitað þau bresku blöð sem hafa snefil af sjálfsvirðingu að taka til umfjöllunar, og fréttin um bönnuðu gúmmígrísina á  velferðarsviði borgarstjórnarinnar í Dudley fór eins og eldur í sinu um hinn vestræna heim, að minnsta kosti yfir Ermasundið, til "hinnar íhaldssömu raddar Evrópu" og yfir Atlantshafið til grísa-elskandi föðurlandsvina þar í álfu.

Nema á litlu eyjunni í norðri, Íslandi, þangað barst fregnin um þennan merka atburð ekki fyrr en  seint og um síðir með frétt í Morgunblaðinu 27. febrúar, 2008, og var þá aðeins greint frá honum í þessum (ríflega) tveimur línum:

"Þá liggur nú fyrir tillaga um það í bæjarráði Dudley að banna allar myndbirtingar af grísum á vegum hins opinbera en í tillögunni er Gríslingur úr sögunni um Bangsímon nefndur sem dæmi um grís sem ætti að banna."

Svona seinagangur nær náttúrulega ekki nokkurri átt!

(Heyrði ég einhvern segja EINELTI?)

Danska skáldið H. C. Andersen samdi á sínum tíma ævintýri um fjöður sem varð að fimm hænum. Mér sýnist að af þeirri sögu sem ég hef sagt ykkur hér að framan megi draga þann lærdóm að litlir gúmmigrísir geti líka blásið út og fjölgað sér meira en margan grunar.

Move over Obama Girl

 

 

 

 

 

 

 Kíkið á þetta

Grísaveisla á Íslandi í boði Jótlandspóstsins

Mér finnst það sorglegt að enn skuli Morgunblaðið birta frétt sem það tekur beint upp úr Jótlandspóstinum, blaði sem er lengst til hægri í danskri pólitík og styður stefnu Danska Þjóðarflokksins, stefnu sem er mjög neikvæð í garð innflytjenda. Mér finnst þetta fréttaval og val á heimild segja mér meira um Morgunblaðið en um múslima og íslam.

Fortis er alþjóðlegur banki, ég held ekki að sparigrísagjafir til barna vegi þungt í viðskiptum hans. Mér myndi finnast þessi "frétt" alveg sprenghlægileg, ef hún væri ekki svo sorglega augljós og einfeldingsleg tilraun til að kynda undir fordómum gegn íslam. Ennþá sorglegra finnt mér að sjá hversu vel það tekst hér á Íslandi með endurbirtingu Moggans á "fréttinni", eftir skrifum margra Moggabloggara að dæma.

Sjá einnig hér, þennan tengil fékk ég í færslu Tinnu G. Gígja um þessa sömu "frétt". 

Sótt að gríslingum

Framför

Þetta er stórkostleg framför í læknismeðferð. Það hlaut að koma að því að það yrði þróað eitthvað í staðinn fyrir gifsið, sem er þungt í vöfum og erfitt fyrir sjúklinginn. Sem betur fer hef ég aldrei þurft að vera í gifsi, en ég veit að það er mjög óþægilegt á allan hátt að þurfa að dúsa í því í margar vikur.

Ég sé samt fyrir mér að nýja spelkan kalli á það að sjúklingurinn verði að taka sjálfur meiri ábyrgð á batanum, ekki vera trassi og "gleyma" að vera með hana, eða að vera að gera allt mögulegt sem ekki er ráðlegt að gera fót- eða handleggsbrotinn, þó hann verði ekki lengur "hreyfihamlaður" af því að vera með gifs og geti farið allra sinna ferða.

Gott mál.

Nýjung leysir gifsið af hólmi

Listahátíð í Reykjavík

Nú hefur dagskrá Listahátíðar í Reykjvavík verið birt og mun hún hefjast 15. maí næst komandi. Miðasalan hófst í dag.

Blindandi markmið?

Hvað í skrattanum á Mogginn við með "blindandi markmið"? Þýðing á hverju er það nú hjá þeim? hugsaði ég fyrst þegar ég las þessa frétt og í dágóða stund á eftir velti ég þessu stíft fyrir mér...ég verð að reyna lesa greinina aftur og vandlegar til að komast að þessu (svo sem ekert nýtt fyrir mér) hugsaði ég svo og byrjaði á henni aftur: Bindandi markmið...ha, ha, ha, ég held ég ætti bara að fara snemma í háttinn svona einu sinni...

Bindandi markmið samþykkt?

Fjölmiðlarnir bera líka ábyrgð

Grein eftir Lisbeth Knudsen, aðalritsjóra Berlingske Tidende, sem birtist á bloggsíðu hennar sunnudaginn 24. febrúar, 2008.

Brunnir bílar. Logandi ruslagámar. Órói á götum annars friðsælla bæja á landsbyggðinni. Nú einnig brunnar sólbaðsstofur. Það hefur verið erfitt að þekkja okkar litlu, friðsælu Danmörku síðustu vikurnar, þegar allir eru venjulega í vetrarfrí. Að hópar hörðustu óeirðaseggjanna skuli samanstanda af unglingum á aldrinum 14-17 ára gerir ekki auðveldara að skilja hvað er að gerast í kringum okkur. Stjórnmálamennirnir ræða aðgerðaáætlanir um mannafla til að hafa stjórn á unga fólkinu. Lögreglan talar um hvernig fjölmiðlar miðla fréttum, og þau áhrif sem umfjöllun þeirra hefur á það að atburðirnir smitast á milli og dreifa úr sér.

Sama hvað manni finnst um það hvort það sé viðeigandi að lögreglan beini því til sjónvarpsstöðvanna að skrúfa niður í "fyrst með fréttirnar - dramatíkinni", þá er nauðsynlegt að það komi fram að það getur verið fjölmiðlaumfjöllunin sjálf og áhrifin af henni sem gefur þeirri slæmu hugmynd að kveikja í bílum byr undir vængi til að breiðast út til allra krummaskuða á landinu. Ef maður á ekki möguleika á að verða ein af topp-stjörnunum í X-Factor eða einhverjum öðrum  áhugamaður-verður-stjarna-þætti má reyna að fanga athyglina með öðru móti. 

Eins og fréttaritari Berlingske Tidende í París, Bjørn Willum skrifaði nýlega í blaðið, þá fá ungu brunavargarnir ekki hugmyndina frá heimabæ fjölskyldunnar í Túnis eða á tyrknesku hásléttunni. Þeir hafa nefnilega alist upp sem hluti af hinum vestræna heimi. Hugmyndin kemur úr vestrænum tölvuleikjum á netinu, þar sem unga fólkið nú, í staðinn fyrir "game-score", skiptist á sms-um um fjölda "skoraðra" bíla, gámabruna og fréttaskota. Árið 2005 tók ég þátt í hinni stóru árlegu, alþjóðlegu NewsXcange ráðstefnu um rafræna fréttamiðlun.

Það var rétt eftir óeirðirnar miklu í frönsku úthverfunum. Dauði tveggja ungmenna á flótta undan lögreglu kom af stað margra vikna öldu skemmdaverka og olli 10.000 bílaíkveikjum. Fjölmiðlaumfjöllunin um atburðina gekk allar nætur og morgna í stóru fréttamiðlunum með dramatískum upptalningum á nýjum íkveikjum. Sérfræðingur eftir sérfræðing var dreginn inn í sjónvarpsstúdíóin til að útskýra, hvað væri að gerast. Á ráðstefnunni var komið á umræðu milli eins fulltrúa frá CNN og tveggja fulltrúa fréttamanna franskra sjónvarpsstöðva.

Á ákveðnum tímapunkti á meðan á þessum miklu óeirðum stóð ákváðu frönsku sjónvarpsstöðvarnar að sýna ekki beinar fréttir frá atburðunum kvöld eftir kvöld, en birta frekar áreiðanlegar tölur um atburði næturinnar næsta morgun. Þær fundu nefnilega út að brunarnir og skemmdarverkin stóðu í nánu samhengi við gífurlegan fjölda sjónvarpsbíla á svæðinu. Það var ekki kveikt í fyrr en bílarnir voru komnir á staðinn og gátu tekið myndir. CNN og BBC World héldu áfram sínum nákvæmu beinu útsendinum frá atburðunum.

Nú færðist fjör í umræðurnar. Ber sjónvarpsstöðvunum ekki skylda til að flytja áhorfendum fréttir af atburðum, sama hversu stórt hlutverk þeirra sjálfra verður við það, eða eiga þeir að axla pólitíska ábyrgð með þeirri sjálfsgagnrýni sem það getur leitt af sér? Flest okkar tóku þá afstöðu á þessum tíma að það væri ekki hlutverk fjölmiðla að taka tillit til stjórnmála. Að það væri hlutverk okkar að flytja fréttir af því sem gerist, lýsa afleiðingunum og greina sjónarhornin.

En þegar nú það að komast í fjölmiðlana er takmark sumra brennuvarganna, og þegar það er töff að skiptast á upplýsingum um það á samskiptasíðum internetsins, getum við þá firrt okkur ábyrgð? Það getum við ekki lengur. Þess vegna verða fjölmiðlarnir - og ekki hvað síst sjónvarpsstöðvarnar - að taka þátt í umræðunni um það þegar fréttafjölmiðlarnir skapa sjálfir fréttirnar og miðla síðan þeim fréttum sem þeir hafa sjálfir skapað. 

Þýð. G.B.Ú. 

Á bloggsíðu Lisbeth Knudsen má lesa fjölda (50+) athugasemda við greinina, þó auðvitað allar á dönsku. 

Mjá!

 

Það er hollt að eiga kött (tengill)

Danskt samsæri - !

Jótlandspósturinn birti í grein 18. febrúar hluta úr dreifibréfi sem Hizb ut-Tahrir sendi út í tilefni atburða síðustu daga, þar sem kemur fram að þeir telji að ætlun Dana sé að kúga múslima:

"Málið er það að þeir ætla sér - annars vegar - aðeins að kúga múslima með hræðsluáróðri, ógnarstjórn og einræði og þvinga þá til að viðurkenna hina fölsku menningu Vesturlanda, þar með talið veraldarhyggjuna, lýðræðið og "tjáningarfrelsið", og að hrella múslima í þeim tilgangi að afvegaleiða þá frá Íslam, Kóraninum og virðingunni fyrir Múhameð (saaws) og að fylgja Sharialögunum. Þetta síðast nefnda er einmitt það sem danska stjórnin lítur á sem hina stóru hindrun í veginum fyrir því að hin pólitíska aðlögunarstefna gangi í gegn."

Þvílíkar þversagnir sem hér ber fyrir augu! Þetta heitir á hundamáli að bíta í hendina sem gefur þér.

Ég segi nú bara eins og Villy Søvndal formaður Sósíalíska Þjóðarflokksins (SF) sagði í bloggfærslu sinni 19. febrúar: "Ef þeir eru svo heimskir að vilja sjá kalífadæmi og sharíalögum komið á, þá eru þeir einfaldlega í vitlausu landi. Þeir hafa ekkert að gera í Danmörku og þeir munu ekki öðlast það sem þeir berjast fyrir".

Þetta segir Villy svo í niðurlagi bloggfærslu sinnar 22. febrúar:

"Í mínum augum er það alveg afgerandi að núna er meiri gróska í kringum spurninguna en sést hefur lengi:  Við erum í fullri alvöru komin á þann stað að skilin milli fólks [hafa skýrst, að þeir] sem vilja lýðræði, rétt til frelsis og friðsamt líf í Danmörku verða að taka afstöðu á móti þeim sem vilja trúarlegt einveldi án réttinda til frelsis fyrir einstaklingana.

Og að auki höfum við fengið það að athyglin hefur beinst að því að ekki er hægt að leyfa að trúarhiti (det stærkt religiøse) skilgreini afstöðu meirihluta múslima til trúar sinnar eða danska samfélagsins eða danskra stjórnmála.

Þetta tvennt er mikilsverður árangur af umræðunni þessa viku. Það birtir.

Villy - " 

Til umhugsunar:

Ég vona að Danir geri sér ljósa grein fyrir því að ef að finnst flötur á því í lögum að leysa Hizb ut-Tahrir upp, þá er fylgir því sú hætta  - því þessir menn gefast ekkert upp og þeir eru ekkert að fara (til þess hafa þeir það of gott í lille Danmark!) - að samtökin gerist neðanjarðarhreyfing í Danmörku og fari að stunda "moldvörpuhernað" þar - þá eru þeir fyrst orðnir hættulegir í alvörunni, - sem síðan myndi kalla á að leyniþjónusta í landinu yrði efld - vilja menn það? Er þá ekki skárra að leyfa þeim að skottast opinberlega í mótmælagöngum og að þeir séu allir undir eftirliti á einum stað? Hmm...

Danskir múslimar sameinast á mót Íslamska Trúfélaginu

Íslamska Trúfélagið (Islamsk Trossamfund) sætir nú harðri gagnrýni á meðal margra múslimskra samtaka í Danmörku. Trúfélagið leyfir sér að tala fyrir hönd allra múslima, segja þau. 

Íslamski söfnuðurinn í norðvestur hluta Kaupmannahafnar hefur í áratug látið í sér heyra sem rödd múslima í samfélagsumræðunni í Danmörku. En nú er það á enda. Í fyrsta lagi eru samtökin ekki samstiga meirihluta múslima í landinu - og í öðru lagi er það mjög gagnrýnivert að trúfélagið er tilleiðanlegt við hin öfgafullu og ólýðræðislegu samtök Hizb ut-Tahrir. Þannig hljóðar gagnrýnin.

Zubair Butt Hussain, formaður regnhlífarsamtaka danskra múslima, Muslimernes Fællesråd, sem sameinar 13 stór félög, hafði í gær þetta um málið að segja:

"Muslimernes Fællesråd telur ljóst að umræðan seinustu daga hafi ekki verið út frá sjónarmiðum sem eru einkennandi fyrir danska múslima."

Skoðun Hussains er sú að Íslamska Trúfélagið gefi út eins konar falska vörulýsingu.

"Nafnið Íslamska Trúfélagið er í þessu sambandi óheppilegt nafn á félagi; það á ekki rétt á sér eins og til dæmis nafn Mosaiska Trúfélagsins, þar sem það talar ekki fyrir hönd allra danskra múslima. Muslimernes Fællesråd hefur, með sína tæplega 40.000 meðlimi, ekki átt fulltrúa í umræðunni upp á síðkastið. Við förum fram á margbreytilegri mynd af dönskum múslimum, svo að einn einstakur hópur fái ekki leyfi til að taka sér einkarétt á að gefa út yfirlýsingar," segir Zubair Butt Hussain. 

Í elstu mosku Danmerkur, Nusrat Djahan-Moskunni i Hvidovre, tekur imaminn, hinn pakistanski Naimatullah Basharat, skýra afstöðu á móti því að ein moska tali fyrir hönd allra múslima.

"Það eru svo margs konar múslimar í Danmörku. Við höfum okkar eigin skoðanir og höfum engan áhuga á því að einhverjir taki að sér að tala fyrir hönd okkar. Stundum erum við ósammála Íslamska Trúfélaginu. Allir múslimar eru sammála um að teikningarnar af spámanninum eru sorglegar. En þegar að því kemur að bregðast við þeim - þá erum við mjög ósammála."

Úrdráttur úr grein í Berlingske Tidende 

Þetta eru þrjú stærstu samtök múslima í Danmörku, samkvæmt bloggi Helen Latifi:

Muslimernes Fællesråd: 40.000

Dansk Muslimsk Union: 25.000

Islamisk Trossamfund: 15.000

Myndin sem fylgir færslunni er fengin að láni af heimasíðu MF . Hún er tekin af Ahmed Krausen.

Ríkislögmaður kannar Hizb ut-Tahrir í Danmörku

 

 

 Meirihluti danska þingsins styður tillögu um að samtök Íslamista í Danmörku, Hizb ut-Tahrir verði leyst upp, takist ríkislögmanni að finna því lagalega stoð. Dómsmálaráðherra hefur þrýst á að samtökin verði rannsökuð. 

Ríkislögmaður hefur áður rannsakað Hizb ut-Tahrir og fann þá ekkert sem réttlætt gat bann. En formaður samtakanna, Fadi Abullatifs, fékk fangelsisdóm, eftir þessi skilaboð voru rakin til hans: "Útrýmið þjóðarleiðtogum ykkar, ef þeir eru fyrir ykkur."

Þann dóm telur dómsmálaráðherrann, Lene Espersen (K), kalla á rannsókn á því hvað fram fer innan samtakanna. 

Ef ríkislögmanni tekst að finna lögfræðilegan grundvöll fyri því að leysa samtökin upp, mun það gerast með heimild í ákvæði dönsku stjórnarskrárinnar (Grundloven) um félagastarfsemi, sem bannar félögum að "starfa með ofbeldi". Samtökin yrðu þá leyst upp fyrir dómstólunum. 

Lagalegt bann er allt annað mál að sögn dómsmálaráðherrans. 

"Við getum ekki byrjað að banna pólitískar hreyfingar, af því að þær eru á annarri skoðun en við. Þá notum við sömu aðferðir og lönd án tjáningarfrelsis. Og það megum við alls ekki," segir hún.

Að sögn blaðafulltrúa ríkislögmanns hefur ekki verið tímasett hvenær lögfræðingarnir verði búnir að meta hvort fyrir liggi  nægar ástæður til að leysa Hizb ut-Tahrir upp. Dómsmálaráðherra reiknar með að svara verði að vænta eftir tvo mánuði.

 Úrdráttur úr grein í Berlingske Tidende

Myndin hér að ofan er frá fundi sem Hizb ut-Tahrir hélt síðast liðið sumar  í Nørrebrohallen, sem imam Íslamska Trúfélagins í moskunni á Dothehavevej, Mostafa Chendid, tók þátt í, en einnig má á myndinni sjá formann samtakanna,  Fadi Abdullatif, i miðju.  Ljósmynd: Morten Juhl

Ungur sláttumaður

 

 

Þessa mynd tók pabbi af móðurbróður mínum norður í Fljótum í Skagafirði rétt fyrir miðja síðustu öld. Það er óhætt að segja að líf barna hér á landi hefur breyst mikið síðan hún var tekin.

Myndin er svona óskýr vegna þess að hún er skönnuð inn eftir ljósmynd sem er u.þ.b. 2 cm á kant, filman er glötuð.

Orsökin var...???

Ég spyr mig að því eftir lestur þessarar fréttar af hverju ekkert er fjallað um orsakir þess að dyr flugvélarinnar opnuðust? Mér finnst fjallað um þetta eins og þetta sé óheppilegt atvik eða slys, sem hafi orðið nánast eins og fyrir ófyrirsjáanlega duttlunga einhverra náttúruafla, en ekki vegna tæknigalla eða þess að búnaður hafi gefið sig.

Alltof oft finnst mér fréttaskrifarar Morgunblaðsins alls ekki standa sig. 

Flaug með opnar dyr til Hornafjarðar

Léttlestir

Eitt þeirra atriða, auk annarra umhverfivænna, sem ég sé sem stóran kost við það að fá léttlestarkerfi (metro) hér í Reykjavík, fram yfir að nota strætó, er sá að þá myndi maður sleppa við að norpa skjálfandi á biðstöðvum og bíða eftir vagni. Maður myndi fara á neðanjarðarstoppistöð, jafnvel akandi á bílnum sínum og leggja honum yfir daginn við stöðina, eins og margir gera í úthverfum erlendis, og bíða svo inni í hlýju og notalegheitum!

Að eiga kost á þessu tel ég að yrði, miðað við það veðurfar sem við búum við hér á landi, mjög hvetjandi þáttur í átt til þess að menn myndu nýta sér almenningssamgöngur meira en gert er í dag, auk þess ávinnings að það myndi gera fólki mögulegt að spara útgjöld til bensínkaupa, og jafnvel gera það ónauðsynlegt að hafa marga bíla á einu heimili, sem hlýtur að leiða til umtalsverðs sparnaðar. Með þessu móti sleppur fólk líka við stressið í umferðinni og leit að bílastæðum, sér í lagi í miðborginni, sem gæti í framhaldinu leitt til afslappaðra þjóðfélags . Ekki veitir nú af.

Miðað við hvað við framleiðum mikið af ódýru rafmagni hér á Íslandi er ég sannfærð um að þessi framkvæmd er mjög hagkvæm lausn í samgöngumálum okkar borgarbúa til framtíðar litið og þegar heildarmyndin er skoðuð, miðað við það sem nú er, þegar umferðarþungi og útblástur bifreiða er orðið vandamál í borginni. Að grafa stokka fyrir lestarkerfi undir borgina ætti heldur ekki að vera verkefni sem væri okkur ofviða, fyrst menn hafa látið sér detta í hug í fullri alvöru að grafa göng út í Vestmannaeyjar. 

Gott mál!

Pólitískt sjónarspil í Danmörku

Undanfarna daga höfum við orðið áhorfendur að vel sviðsettu leikriti hægri afla í danskri pólitík. Tímasetning þessa leikrits var hárrétt valin með tilliti til þess óróleika og rósta sem staðið höfðu í nokkurn tíma, í vissum hverfum Kaupmannahafnar, og fylgdu í kjölfarið af óánægju hóps ungs fólks vegna hertra aðgerða lögreglu gegn glæpum. Við þær aðgerðir, sem felast í reglubundinni vopna- og fíkniefnaleit, töldu ungir menn af erlendu bergi brotnir framkomu lögreglunnar gagnvart sér við framkvæmd hennar vera niðurlægjandi.

Ég tel óhætt að fullyrða að hægri öflin hafi í ljósi þeirra atburða er fyrr greinir séð sér leik á borði að búa til strengjabrúður úr öfgafullum múslimum í Danmörku, til að setja á svið leikrit í þágu eigin málstaðar, þar sem þeir voru í aðalhlutverkunum, en óeirðirnar á undangengnum vikum mynduðu vel viðeigandi bakgrunn, sem síðan lýstist enn frekar upp í ljósi eldhafsins sem frumsýningin á Sankt Hans torgi magnaði upp. Það að  nokkur vafi virðist leika á því að danska lögreglan hafi í reynd haft næg sönnunargögn í höndum til þess að réttlæta handtöku tveggja Túnismanna sem nú sitja í varðhaldi í fangelsi í Kaupmannahöfn, vegna ásakan um að þeir hafi ætlað að myrða teiknara einnar af dönsku skopmyndunum, og til þess að hægt sé að ákæra þá, virðist mér renna stoðum undir þetta.

Túnismennirnir voru handteknir, að því er virðist, án þess að fyrir lægju neinar sannanir fyrir því að þeir hafi ráðgert að myrða teiknarann, að minnsta kosti hefur lögmaður þeirra ekki hingað til fengið að sjá nein gögn sem að málinu lúta. Það virðist vera að algjörlega hafi verið treyst á það að ásakanirnar á hendur þeim nægðu til að vísa þeim úr landi án dóms, í krafti laga um hryðjuverk sem Danir flýttu sér að setja eftir 11. september, 2001, meðan allur hinn vestræni heimur var enn í áfalli eftir árásina á Tvíburaturnana. En málið er þó ekki svo einfalt, því í dag vakna margir Danir upp við vondan draum og þykir slík brottvísun mannréttindabrot. Danskur dómstóll mun á næstu dögum taka afstöðu til þess hvort slík brottvísun sem krafist er sé brot á mannréttindum, að teknu tilliti til tveggja dóma mannréttindadómstóla.

Þegar eftir handtöku Túnismannanna tveggja fóru dönsku dagblöðin á stúfana, með Jótlandspóstinn, sem ljóst og leynt styður danska Þjóðarflokkinn (DF) og upphaflega birti skopmyndirnar, sem fánabera í broddi fylkingar, og endurbirtu hinar umdeildu skopmyndir, sem andsvar við - ja, hverju? Handtöku tveggja manna, sem bornir voru sökum, sem lögmaður þeirra hefur enn (22. febrúar) ekki fengið í hendur gögn um að eigi við rök að styðjast! Menn börðu sér á brjóst og töluðu fjálglega um heilagt tjáningarfrelsi og að ekki mætti láta heiftúðuga araba komast upp með morðhótanir á hendur saklausum borgurum - birting myndanna væri þeim makleg málagjöld! Mátti af ummælum sumra ætla að hafið væri heilagt stríð fjölmiðla á hendur þeim sem ekki hafa húmor fyrir pólitískum skopmyndum með trúarlegu ívafi, þar sem gert er grín að eldfimasta málefni alþjóðastjórnmála í dag.

Þau viðbrögð sem vænta mátti og stofnað var til með handtökunum og endurbirtingunni létu vitanlega ekki standa á sér - öfgasinnaðir múslimar tóku þegar við sér og léku það hlutverk sem þeim var úthlutað í þessu sjónarspili af stakri prýði og eins og til var ætlast! Tjáningarfrelsi sitt notfærðu sér á ámátlegan og aumkunarverðan hátt til að úthúða því sama frelsi og kalla það plágu; grátleg heimska má slíkt að kallast og aðeins til þess fallið að styrkja það álit almennings að innan höfðuskelja þessa fólks leynist lítið annað en bænastagl og hafragrautur.

Þessa dagana mótmæla hófsamir múslimar þessum skrípaleik, vegna þess að þeir sjá í gegnum hann og er tilgangur hans augljós, það er að segja að kynda undir báli kynþáttafordóma í landinu og auka þar með fylgi við þá flokka sem vilja að tekið sé af hörku á málefnum innflytjenda.

Þversögnin í þessu er þó sú að eftir seinustu mótmælagöngur og ræðuhöld Hizb ut-Tahrir, með þátttöku Íslamska Trúfélagsins, taka bæði hófsamir múslimar og sósíalistar að vissu leyti undir sjónarmið hægri aflanna, sem lengi hafa vilja banna samtökin, - þó hvorki múslimar né sósíalistar hafi nefnt orðið bann, - þar sem þau eru á þeim bæjum álitin vera farin að skaða málstað innflytjenda meira en hægt er umbera lengur, þegar þau með öfgafullum viðbrögðum sínum og fáránlegum andsvörum meðlima sinna við ögrunum hægri aflanna dansa eftir pípu þeirra. 

Ja, hvað ætli Shakespeare hefði sagt, hefði hann verið áhorfandi að þessu leikriti, - ætli hann hefði ekki bara tautað:

"Something is rotten in the state of Denmark" ?